Stam: Ferguson sagði mér frá sölunni á bensínstöð

Jaap Stam, fyrrverandi leikmaður Manchester United, talar mikið um Alex Ferguson og viðskilnað sinn við félagið á sínum tíma í viðtali við fjölmiðla um helgina.

„Ég var fljótur að átta mig á því að félagið vildi losna við mig og það leið ekki að löngu þangað til að ég var seldur. Þegar ævisaga mín Head to Head kom út varð samband mitt við Ferguson slæmt og eftir það átti ég ekki viðreisnarvon."

„Einn morguninn sagði ég öllum hvað mér fyndist um meðferð mína hjá félaginu og rauk af æfingasvæðinu. Stuttu síðar hringdi Ferguson í mig og spurði hvar ég væri, hann vildi hitta mig strax. Við hittumst á bílastæði við bensínstöð og þar tilkynnti hann mér að ég yrði seldur og það strax til Lazio. Ég féllst á það og dvöl mín hjá félaginu var búin."