ESB-viðræður við Tyrki hafnar

Utanríkisráð­herrar Evrópu­sambandsins komust eftir maraþonfund í Lúxemborg gær að samkomulagi um orðalag samningsumboðs sambandsins fyrir aðildarviðræður við Tyrkland, sem áformað hafði verið að hæfust formlega í gær. Eftir að hafa skoðað niðurstöðuna féllust Tyrkir á að ganga til viðræðnanna undir þeim skilyrðum sem kveðið er á um í samningsumboðinu. Utan­ríkisráðherrann Abdullah Gül hélt því ­ásamt tyrknesku samninganefndinni til Lúxemborgar í gærkvöld. Strax eftir komuna þangað átti hin formlega opnunarathöfn aðildarviðræðnanna að fara fram, með hátt í hálfs sólarhrings seinkun. Um fjórir áratugir eru síðan Tyrkir hófu fyrst að knýja dyra hjá Evrópusambandinu og í desember í fyrra ákváðu leiðtogar þess að aðildarviðræður skyldu hefjast hinn 3. október í ár. Hið áformaða upphaf viðræðnanna komst í uppnám er ríkisstjórn Austurríkis krafðist þess að samningsumboðið yrði ekki afgreitt nema þess yrði getið að Tyrklandi kynni að verða boðin önnur lausn á tengslum við sambandið en full aðild. Tyrklandsstjórn hafði aftur á móti sagt að hún áliti ekkert minna en fulla aðild koma til greina. Utanríkisráðherrar ESB-ríkjanna 25 sátu á rökstólum í Lúxemborg fram á nótt á sunnudag og allan gærdaginn til að ­reyna­ að fá Austurríkismenn til að gefa eftir. Þegar komið var undir kvöld í gær féllst loks austurríski ráðherrann, Ursula Plassnik, á það og samningsumboðsskjalið var sent til Ankara. Erindrekar ESB-ríkja sögðu að Plass­nik hefði loks látið undan og fallist á að í samningsumboðinu stæði að „sameiginlegt markmið viðræðnanna væri innganga“ Tyrklands í sambandið. Reiknað er með að aðildarvið­ræður­ við Tyrki taki að minnsta kosti tíu ár, enda langt í land með að landið uppfylli aðildarskilyrðin, bæði efnahagslega og hvað varðar réttarríki og staðla borgaralegs samfélags. Íbúar Tyrklands eru um 70 milljónir, flestir múslimar.