Innlent

Segir ekki tilefni til þess að ætla að sérstakur hafi ekki farið að lögum

Kolbeinn Tumi Daðason skrifar
Vísir/Stefán/Pjetur
Ríkissaksóknari segir ekki tilefni til þess að ætla að að starfsmenn Sérstaks saksóknara hafi ekki farið eftir ákvæðum laga um meðferð sakamála. Þetta kemur fram í tilkynningu frá Sigríði Friðjónsdóttur ríkissaksóknara í dag.

Tilefni skrifa ríkissaksóknara er helgarviðtal Fréttablaðsins við Jón Óttar Ólafsson, fyrrverandi starfsmann embættisins. Þar sagðist Jón Óttar hafa orðið þess áskynja í starfi að sérstakur saksóknari hleraði símtöl verjenda við skjólstæðinga sína. Slíkt er óheimilt samkvæmt sakamálalögum.

„Stemmingin í kringum þetta var eins og hjá krökkum í sælgætisbúð; nú vissu menn betur hvernig verjendur sakborninga myndu stilla vörninni upp,“ sagði Jón Óttar.

Sigríður segir að þegar hún hafi verið skipuð í embætti ríkissaksóknara þann 4. apríl 2011 hafi hún leitast við að koma á eftirliti með hlustunum lögreglustjóra og embættis sérstaks saksóknara. Hafi hún meðal annars krafið embættin um gögn og upplýsingar því tengdu. Þau svör sem borist hafa frá embætti sérstaks saksóknara hafi ekki gefið tilefni til að ætla að þar sé ekki farið eftir ákvæðum laga um meðferð sakamála.

Jón Óttar sagði í viðtalinu um helgina að hann hefði að eigin frumkvæði leitað á náðir ríkissaksóknara vegna þeirra brota sem hann taldi eiga sér stað hjá starfsmönnum embættis Sérstaks saksóknara. Sigríður staðfestir að við rannsókn eigin embættis vegna áætlaðra brota Jóns Óttars og Guðmundar Hauks Gunnarssonar, sem einnig starfaði hjá sérstökum saksóknara, hafi komið fram ábendingar frá Jóni Óttari um misfellur við meðferð rannsóknargagna af hálfu starfsmanna við embætti sérstaks saksóknara.

„Þær ábendingar samrýmast ekki að öllu leyti því sem fram kemur í viðtali við annan af sakborningunum, Jón Óttar Ólafsson, í Fréttablaðinu 13. september sl. og aðrir fjölmiðlar hafa fjallað um á síðustu dögum. Við rannsókn og meðferð málsins hjá ríkissaksóknara á árinu 2012 og í ársbyrjun 2013 var farið yfir umræddar ábendingar, meðal annars við skýrslutökur af öðrum starfsmönnum embættis sérstaks saksóknara. Niðurstaða ríkissaksóknara á þeim tíma var að ekki væri grundvöllur fyrir sérstakri rannsókn eða athugun vegna ábendinganna.“


Tengdar fréttir

Telja lögreglumenn hafa haft beina persónulega hagsmuni af rannsókn

Verjendur telja að lögreglumenn sem rannsökuðu Vafningsmálið svokallaða hafi verið vanhæfir til að rannsaka það þar sem þeir höfðu sjálfir beina fjárhagslega hagsmuni af því að rannsókn myndi leiða til ákæru og af þeim sökum beri að vísa málinu frá. Tekist verður um kröfu þeirra um frávísun í lok þessa mánaðar.

Kæran setti lífið úr skorðum

Jón Óttar Ólafsson, fyrrverandi rannsóknarlögreglumaður hjá sérstökum saksóknara, segir að viðhorf sín til rannsókna efnahagsbrotamála séu gerbreytt eftir að hann sjálfur þurfti að svara fyrir kæru frá embættinu vegna brota á trúnaði í starfi.

Lögreglumenn fóru að selja trúnaðarupplýsingar haustið 2011

Lögreglumennirnir tveir sem sérstakur saksóknari hefur kært til ríkissaksóknara vegna brots á þagnarskyldu hófu að selja skiptastjóra Milestone trúnaðarupplýsingar í lok september 2011, löngu áður en þeir hættu hjá embættinu. Þeir héldu áfram að yfirheyra sakborninga og starfa hjá embættinu sem verktakar.

Boðar skoðun á innra skipulagi embættisins

Verklagsreglur hjá sérstökum saksóknara verða endurskoðaðar í kjölfar þess að embættið kærði tvo fyrrum starfsmenn til ríkissaksóknara fyrir brot á þagnarskyldu. Málið hefur ekki áhrif á dómsmál þrotabús Milestone, segir skiptastjóri.

Starfsmenn sérstaks saksóknara enn til skoðunar

Rannsókn Ríkissaksóknara á málum tveggja starfsmanna embættis sérstaks saksóknara, þeirra Guðmundar Hauks Gunnarssonar og Jóns Óttars Ólafssonar, stendur enn yfir. Samkvæmt upplýsingum frá Sigríði Friðjónsdóttur, ríkissaksóknara, er búist við að henni ljúki á næstu vikum. Mennirnir tveir eru grunaðir um brot á þagnaskylduákvæði í störfum sínum þegar þeir seldu þrotabúi Milestone upplýsingar sem þeir urðu sér úti um í störfum sínum fyrir sérstakan saksóknara. Embætti sérstaks saksóknara kærði mennina í maí síðastliðnum og hefur rannsókn staðið yfir síðan þá.

Ríkissaksóknari verður að skýra afstöðu sína

Jónas Þór Guðmundsson, formaður Lögmannafélagsins sagði í fréttum Stöðvar 2 í kvöld að ríkissaksóknari yrði að skýra afstöðu sína í málinu, og hvað hann hefði fengið upplýst í greinargerð Jóns Óttars frá 2012 þar sem hann lýsir hinum ólöglegu hlerunum. Lögmenn hafi lengi haft áhyggjur af slíkum hlerunum.

Unnu skýrslu um gjaldþol Milestone - sinna rekstri á sviði rannsókna

Lögreglumennirnir tveir sem hafa verið kærðir til ríkissaksóknara, Guðmundur Haukur Gunnarsson lögfræðingur og Jón Óttar Ólafsson, doktor í afbrotafræðum, reka fyrirtækið Pars Per Pars, sem sérhæfir sig í ýmis konar rannsóknum og vinnu fyrir þrotabú fjármálafyrirtækja og fjárfestingafélaga, auk annarra rannsóknarverkefna. Jón Óttar hefur m.a. sinnt stundakennslu við Háskóla Íslands á sínu fagsviði.

Unnu saman 15 tíma á dag fyrir Milestone samhliða vinnu hjá saksóknara

Lögreglumennirnir tveir sem sérstakur saksóknari kærði til ríkissaksóknara fyrir þagnarskyldubrot unnu í sjö vikur að meðaltali 15 klukkustundir á dag fyrir þrotabú Milestone síðastliðið haust á meðan þeir voru í fullu starfi fyrir sérstakan saksóknara.

Mest lesið


Fleiri fréttir

Sjá meira


×

Mest lesið