Lög­reglu­menn fóru að selja trúnaðar­upp­lýsingar haustið 2011

Lögreglumennirnir tveir sem sérstakur saksóknari hefur kært til ríkissaksóknara vegna brots á þagnarskyldu hófu að selja skiptastjóra Milestone trúnaðarupplýsingar í lok september 2011, löngu áður en þeir hættu hjá embættinu. Þeir héldu áfram að yfirheyra sakborninga og starfa hjá embættinu sem verktakar.

Þó þeir Guðmundur Haukur Gunnarsson og Jón Óttar Ólafsson, eigendur Pars Per Pars, hafi formlega látið af störfum um síðustu áramót, eins og sérstakur saksóknari sagði í yfirlýsingu, þá héldu þeir áfram að vinna hjá embættinu sem verktakar eftir að þeir stofnuðu Pars Per Pars.

Þeir mættu til dæmis við þingfestingu í svokölluðu Svartháfsmáli í janúar síðastliðnum og sátu þá sitt hvorum megin við saksóknarann Hólmstein Gauta Sigurðsson.

Þá tóku þeir þátt í skýrslutökum sem verktakar. Fyrirtæki þeirra seldi þrotabúi Milestone skýrslu sem þeir sömdu á grundvelli upplýsinga sem þeir öfluðu meðan þeir voru enn starfsmenn sérstaks saksóknara, en þegar málið komst upp var það kært til ríkissaksóknara.

Ráðningarsamningur Pars Per Pars við þrotabú Milestone, sem fréttastofan hefur séð, er dagsettur 27. september 2011. Löngu áður en þeir létu af störfum hjá sérstökum saksóknara.

Ólafur Þór Hauksson segir að embættið hafi ekki haft vitneskju um þetta fyrr en löngu síðar.

Skýrslan sem þeir félagar hjá PPP skrifuðu meðan þeir voru enn lögreglumenn hjá sérstökum saksóknara er 17 blaðsíður að lengd og greiddi skiptastjóri Milestone 30 milljónir króna fyrir hana.

Sigurður G. Guðjónsson, lögmaður Ingunnar Wernersdóttur, fyrrverandi hluthafa í Milestone segir að salan á skýrslunni sé hegningarlagabrot.

„Lögreglan er bundin þagnarskyldu og þegar lögreglan tekur gögn, sem hún fær í störfum sínum, vinnur úr þeim og selur þá hefur hún gerst brotleg við hegningarlög. Það er mjög alvarlegt brot og þetta er miklu miklu alvarlegra brot en sérstakur saksóknari lætur í veðri vaka. Þetta er ekki bara brot á trúnaðarskyldu, heldur er þetta hegningarlagabrot," segir Sigurður.

Sigurður er þar að vísa til 136.gr. hegningarlaga, varðandi þagnarskyldu opinberra starfsmanna. En Ólafur Þór Hauksson vill ekki tjá sig um efni kærunnar. Hefur verið talað um brot á lögreglulögum í þessu samhengi, en um er að ræða sérlög áðurnefndu ákvæði til fyllingar.

Ingunni Wernersdóttur, systur þeirra Karls og Steingríms, var stefnt af þrotabúi Milestone til að endurgreiða meint ólögmætt hluthafalán upp á tvo og hálfan milljarð króna sem hún á að hafa fengið áður en Milestone fór í þrot, en hún seldi sinn hlut töluvert fyrir hrunið og voru hin meintu ólögmætu viðskipti gerð í tengslum við það. Sjálf hefur Ingunn sagst hafa verið í góðri trú. Skýrslan umdeilda frá Pars Per Pars var meðal gagna máls þrotabúsins á hendur Ingunni. Þetta finnst Sigurði afar gagnrýnivert, en hann segir óforsvaranlegt að trúnaðargögn lögreglu séu seld einkaaðilum.

„Það á enginn að hafa aðgang að neinum gögnum sem varða rannsókn opinberra mála heldur en þeir sem eru í starfi hjá lögreglunni," segir Sigurður G. Guðjónsson.

Ekki hefur náðst í þá Guðmund Hauk og Jón Óttar þrátt fyrir ítrekaðar tilraunir. thorbjorn@stod2.is