Unnu skýrslu um gjaldþol Milestone - sinna rekstri á sviði rannsókna

Lögreglumennirnir tveir sem hafa verið kærðir til ríkissaksóknara, Guðmundur Haukur Gunnarsson lögfræðingur og Jón Óttar Ólafsson, doktor í afbrotafræðum, reka fyrirtækið Pars Per Pars, sem sérhæfir sig í ýmis konar rannsóknum og vinnu fyrir þrotabú fjármálafyrirtækja og fjárfestingafélaga, auk annarra rannsóknarverkefna. Jón Óttar hefur m.a. sinnt stundakennslu við Háskóla Íslands á sínu fagsviði.

Kæra sérstaks saksóknara byggir á því að þeir hafi nýtt sér upplýsingar, meðan þeir voru starfsmenn embættisins, í vinnu fyrir þrotabú Milestone, en líkt og fram komu í fréttum Stöðvar 2 í gær, þá fengu þeir um 30 milljónir króna frá þrotabúinu fyrir ráðgjöf og skýrslugerð um gjaldþol Milestone 2007 til 2008, þ.e. nokkru fyrir fall félagsins. Gögnin hafa m.a. verið lögð fram í málum fyrir dómi sem þrotabúið hefur höfðað, þar á meðal riftunarmálum vegna gjörninga í rekstri Milestone skömmu fyrir fall félagsins.

Þrátt fyrir að þeir hafi látið formlega af embætti um síðustu áramót héldu þeir áfram störfum fyrir saksóknara við yfirheyrslur sem verktakar, fram í febrúarmánuð á þessu ári, líkt og fram kom í fréttum Stöðvar 2 í gær.

Í janúar á þessu ári leitaði þrotabú Milestone til fyrirtækisins lögreglumannanna með það fyrir augum, að svara þremur rannsóknarspurningum með skýrslu, en fréttastofa hefur hana undir höndum.

Þessar spurningar voru, í fyrsta lagi með hvað hætti Milestone hefði greitt skuldir félags sem voru gjalddaga frá miðju ári 2007 og fram að falli þess eftir hrun, í öðru lagi hvort það væru vísbendingar um lögbrot í tengslum við þetta, og í þriðja lagi hvort það væru einhverjar vísbendingar um að starfsmenn, stjórnendur eða eigendur Milestone hefðu talið félagið ógjaldfært frá miðju ári 2007 og fram að gjaldþroti félagsins.

Nánar verður fjallað um málið á Vísi og í fréttum Stöðvar 2 í kvöld.