Sigríður Friðjónsdóttir ríkissaksóknari vill ekki tjá sig að svo stöddu um orð Jóns Óttars Ólafsson, fyrrverandi rannsóknarlögreglumanns hjá sérstökum saksóknara. Jón Óttar segist í viðtali við Fréttablaðið í dag oftar en einu sinni bent ríkisaksóknara brot í störfum Ólafs Þórs Haukssonar, sérstaks saksóknara til dæmis um ólöglegar símhleranar.

Bitur en ekki að hefna

Jón Óttar ræddi við Stöð 2 í kvöld og aðspurður hvort hann hefði einhverra harma að hefna gagnvart sínum fyrrum vinnuveitenda sagði hann ekki svo vera en hann viðurkenndi fúslega að vera bitur gagnvart sinum fyrrverandi vinnuveitendum.

Jón Óttar starfaði hjá sérstökum saksóknara frá 2009 til 2012 en hætti störfum eftir að sérstakur saksóknari kærði hann til ríkissaksóknara. Jón Óttar og meðeigandi hans í rannsóknarfyrirtæki unnu á sama tíma fyrir skiptastjóra Milestone og embætti sérstaks saksóknar en málið gegn þeim var látið niður falla.

Falsaði plögg

Jón segir sérstakan saksóknara hafa vitað af vinnunni fyrir Milestone en eftir kvörtun utanfrá hafi hann komist hjá vandræðum með því að falsa gögn og ákæra Jón Óttar. Hann segist hafa upplýst Sigríði Friðjónsdóttur, ríkissaksóknara um gjörðir saksóknara í málinu gagnvart sér. Hann upplýsti þá ríkissaksóknara um hleranirnar embættisins á samtölum lögmanna og skjólstæðinga í sérstakri greinargerð árið 2012 þar sem hann lýsir þessum hlerunum en ríkissaksóknari aðhafðist ekkert og sagði málin fyrnd.

Jónas Þór Guðmundsson, formaður Lögmannafélagsins sagði í fréttum Stöðvar 2 í kvöld að ríkissaksóknari yrði að skýra afstöðu sína í málinu, og hvað hann hefði fengið upplýst í greinargerð Jóns Óttars frá 2012 þar sem hann lýsir hinum ólöglegu hlerunum. Lögmenn hafi lengi haft áhyggjur af slíkum hlerunum.

Í kvöldfréttum RÚV var það tekið fram að Sigurður Tómas Magnússon, ráðgjafi hjá embætti sérstaks saksóknara, segir það vera ósannindi að embættið hafi stundað hleranir á samtölum. Sjá má viðtalið við Jón Óttar í heild sinni hér að ofan.