Wenger á von á því að bæta við leikmannahópinn

Arsene Wenger, knattspyrnustjóri Arsenal, segist gera ráð fyrir að bæta við 1-2 leikmönnum áður en að félagsskiptaglugginn á Englandi lokar um mánaðarmótin.

Arsenal þurfti að sætta sig við tap í fyrsta leik tímabilsins í dag 3-4 gegn Liverpool á heimavelli en stuðningsmenn Arsenal bauluðu er leikmenn gengu af velli eftir leik.

Sjá einnig:Liverpool hafði betur í sjö marka spennutrylli gegn Arsenal

Granit Xhaka og Rob Holding þreyttu frumraun sína í Arsenal-treyjunni í dag en stuðningsmenn liðsins hafa kallað eftir nýjum framherja.

„Ég vonast til að bæta við 1-2 leikmanni við hópinn og við erum að vinna markvisst í því en við viljum bæta við gæðum í stað þess að bæta bara við fjölda leikmanna,“ sagði Wenger sem viðurkenndi að hann hefði heyrt baul stuðningsmanna að leikslokum.

„Við höfum lent í þessu áður og alltaf náð að svara af krafti. Það er eðli þessa starfs að það sé pressa á manni en ég, rétt eins og stuðningsmennirnir, vonast til að vinna alla leiki sem við förum í.“