Thierry Henry gæti leikið með Arsenal í janúar

Allar líkur eru á því að Thierry Henry muni leika með enska úrvalsdeildarliðinu Arsenal sem lánsmaður en franski framherjinn er samningsbundinn New York í MLS deildinni í Bandaríkjunum.

Hinn 35 ára gamli Henry, lék í tvo mánuði með Lundúnarliðinu á síðustu leiktíð, en hann er í miklu uppáhaldi hjá stuðningsmönnum liðsins eftir að hafa leikið með Arsenal á árunum 1999-2007.

Arsene Wenger knattspyrnustjóri Arsenal hefur óskað eftir því að fá Henry að láni. Það eru töluverðar líkur á því að Henry verði í leikmannahóp Arsenal í ensku bikarkeppninni þegar liðið leikur gegn Swansea þann 6. janúar á næsta ári.