Gerrard frá í sex vikur

Liverpool fékk þær slæmu fregnir í gærkvöldi að fyrirliðinn Steven Gerrard verði frá keppni næstu sex vikurnar.

Gerrard meiddist aftan í læri í 4-1 sigri Liverpool gegn West Ham um helgina. Rannsóknir leiddu í ljós í gær að hann væri tognaður og þyrfti sex vikna hvíld.

Líklegt er að Gerrard muni missa af næstu átta leikjum Liverpool, þar af mikilvægum deildarleikjum gegn Tottenham, Manchester City og Chelsea. Liverpool mun svo eins og önnur úrvalsdeildarlið hefja leik í ensku bikarkeppninni í byrjun janúar.

Gerrard hefur gefið flestar stoðsendingar allra leikmanna í ensku úrvalsdeildinni á tímabilinu til þessa eða sex talsins.

Daniel Sturridge, sóknarmaður, er einnig frá vegna meiðsla og er ekki von á honum fyrr en í lok janúar. Bakvörðurinn Jose Enrique er einnig að jafna sig eftir hnéaðgerð og gæti fyrst komið til baka í febrúar.