Benzema skaut Real í 16-liða úr­­slit | Inter endaði á botni riðilsins

Karim Benzema skoraði bæði mörk Real Madrid í 2-0 sigri á Borussia Mönchengladbach í B-riðli Meistaradeildar Evrópu. Inter Milan og Shakhtar Donetsk gerðu markalaust jafntefli í Mílanó sem þýðir að Inter er fallið úr leik.

Mikil spenna var fyrir leiki kvöldsins í B-riðli enda um að ræða opnasta riðil keppninnar fyrir leiki kvöldsins. Real Madrid og Inter Milan þurftu nauðsynlega á sigri að halda til að komast upp úr riðlinum.

Real Madrid hefur ekki átt góðu gengi að fagna það sem af er vetri en þeir voru hreint út sagt magnaðir í kvöld. Benzema kom heimamönnum yfir á 9. mínútu og tvöfaldaði forystu þeirra eftir rúman hálftíma. Bæði mörkin með skalla, það fyrra eftir fyrirgjöf Lucas Vazquez og það síðara eftir fyrirgjöf Rodrygo.

Staðan orðin 2-0 og reyndust það lokatölur leiksins. Real óð þó í færum og í raun ótrúlegt að liðið hafi ekki skorað fleiri mörk. 

Sigurinn þýðir að Real vinnur riðilinn og Mönchengladbach fer einnig áfram í 16-liða úrslit þar sem liðið endar með jafn mörg stig og Shakhtar Donetsk en með betri innbyrðis viðureignir.

Inter Milan var töluvert sterkari aðilinn í leik sínum gegn Shakhtar en náði ekki að brjóta ísinn. Antonio Conte gerði hverja sóknarsinnuðu skiptinguna á fætur annarri virtist sem varamaðurinn Alexis Sanchez væri að fara koma Inter yfir undir lok leiks.

Fastur skalli hans eftir hornspyrnu fór hins vegar í Romelu Lukaku en ef Belginn hefði ekki verið fyrir hefði knötturinn að öllum líkindum sungið í netinu.

Lokatölur 0-0 sem þýðir að Shakhtar fer í Evrópudeildina á meðan Inter endar í neðsta sæti B-riðils. Er þetta í fyrsta sinn sem Inter endar í neðsta sæti riðlakeppni Meistaradeildarinnar.