Sjáðu mark Willums og grátlegt sigurmark Ítala í Víkinni

Ísland tapaði 1-2 fyrir Ítalíu í síðasta heimaleik sínum í undankeppni EM U-21 árs landsliða í dag.

Tommaso Pobega skoraði sigurmark ítalska liðsins á 88. mínútu en allt stefndi í jafntefli sem hefði komið Íslendingum upp í 2. sæti riðils 1 í undankeppninni. Þeir eru hins vegar áfram í 4. sætinu og verða að vinna Íra á sunnudaginn til að eiga möguleika á að komast á EM í Ungverjalandi og Slóveníu á næsta ári.

Pobega kom Ítölum yfir á 35. mínútu með vinstri fótar skoti eftir fyrirgjöf Riccardos Sottil og misheppnaða hreinsun Íslendinga. Staðan var 0-1 í hálfleik, Ítalíu í vil.

Á 62. mínútu jafnaði Willum Þór Willumsson í 1-1 þegar hann stýrði skoti Andra Fannars Baldurssonar í netið. Markið kom eftir langt innkast Harðar Inga Gunnarssonar og skógarferð ítalska markvarðarins, Marcos Carnesecchi.

Þegar tvær mínútur voru til leiksloka skoraði Pobega sitt annað mark og sigurmark Ítalíu með skoti fyrir utan vítateig sem fór af Alex Þór Haukssyni og í fjærhornið. Lokatölur 1-2, Ítölum í vil.

Mörkin úr leiknum má sjá hér fyrir neðan.