Fólk verði áfram í útlöndum finni það fyrir einkennum

Sóttvarnarlæknir bætti í dag við fleiri löndum á áhættulista vegna kórónuveirunnar og fleiri þurfa því að fara í sóttkví eftir komuna til landsins. Þeir sem finna fyrir einkennum og eru enn í útlöndum eru beðnir um að fresta heimkomu.

Almannavarnadeild ríkislögreglustjóra boðaði til blaðamannafundar um kórónuveiruna í dag. Þar kom fram að aðstæður væru hratt að breytast.

„Við erum að leggja mjög mikla áherslu á að hafa þessar leiðbeiningar tiltölulega einfaldar og skýrar en þær geta breyst á milli daga," sagði Þórólfur Guðnason, sóttvarnalæknir á fundinum.

Lista sóttvarnarlæknis yfir skilgreind áhættusvæði var breytt í dag. Tveimur löndum var bætt á lista yfir svæði með mikla smitáhættu; Suður-Kóreu og Íran. Á listanum eru einnig Kína og fjögur ítölsk héruð, líkt og Lombardía og Veneto þar sem borgarnar Mílanó og Verona eru. Sóttvarnarlæknir mælir gegn ónauðsynlegum ferðum á þessu svæði. Fólk að koma þaðan er beðið um að fara í sóttkví eftir heimkomu og jafnvel fresta henni, finni það fyrir einkennum.

„Ef fólk er úti og finnur fyrir einkennum og er veikt á það að láta vita af sér úti. Það á helst ekki að fara upp í flugvél," sagði Rögnvaldur Ólafsson, lögreglufulltrúi hjá almannavörnum á fundinum í dag.

Endurgreiðsla ef flugfélögin fella niður ferðina

Flugfélögin eru þó ekki að aflýsa ferðum á þessu svæði. Sem dæmi má nefna að hægt er að bóka borgarferð með beint flug til Verona eftir rúma viku. Þrátt fyrir að yfirvöld séu að mæla gegn til dæmis þeirri ferð eiga farþegar ekki rétt á endurgreiðslu. Samkvæmt upplýsingum frá Samgöngustofu myndast sá réttur einungis ef flugrekandinn ákveður að fella niður ferðina.

Þá eru önnur lönd með litla smitáhættu komin á lista sóttvarnarlæknis; Ítalía utan þessara fjögurra héraða og til dæmis Tenerife. Eftir heimkomu þaðan á fólk að gæta sérlega vel að hreinlæti.

„Þvo sér vel um hendur, sleppa því að heilsast með handabandi, kyssast og þess háttar," sagði Rögnvaldur.

Barn í hópi Íslendinga á Tenerife-hótelinu

Nokkuð hefur verið um afbókanir til Tenerife eftir að kórónuveirusmitið kom þar upp. Fjórir sem dvöldu á Costa Adeje Palace hótelinu hafa greinst með veiruna og eru allir hótelgestir enn í sóttkví. Þar á meðal tíu Íslendingar og er eitt barn í hópi þeirra.

Allir hótelgestir hafa verið beðnir um að halda sig inni á herbergi og í gær fengu allir hitamæla. Voru þau beðin um að mæla sig tvisvar á dag. Greinist hiti verður tekin blóðprufa. Sóttvarnarlæknir hefur rætt við fólkið

„Því fólki leið bara vel og hafði svo sem ekkert yfir neinu sérstöku að kvarta. Nema bara yfir þessum óþægilegu aðstæðum sem það var í," segir Þórólfur.

Á fundinum teiknaði sóttvarnalæknir upp verstu mögulegu aðstæður sem talið er að gætu komið upp hérlendis. Eru þá tölur frá Hubei-héraði í Kína, þar sem veiran hefur verið skæðust, yfirfærðar hingað. Sömuleiðis er þá ekki tekið tillit til mögulegra mótaðgerða yfirvalda.

„Þá gætum við búist við að sjá svona þrjú hundruð tilfelli hér á Íslandi, gætum búist við að sjá svona 20 til 25 gjörgæslutilfelli og við gætum búist að sjá upp undir tíu dauðsföll," sagði Þórólfur á fundinum í dag.