Erlent

Geimfarar stefna aftur til jarðar í SpaceX-ferju

Kjartan Kjartansson skrifar
Bob Behnken um borð Dragon-geimferju SpaceX sem lá þá við Alþjóðlegu geimstöðina. Hann og félagi hans Doug Hurley eru nú lagðir af stað heim til jarðar.
Bob Behnken um borð Dragon-geimferju SpaceX sem lá þá við Alþjóðlegu geimstöðina. Hann og félagi hans Doug Hurley eru nú lagðir af stað heim til jarðar. AP/NASA

Tveir bandarískir geimfarar sem voru þeir fyrstu til að fara út í geim með einkafyrirtækinu SpaceX eru lagðir af stað heim til jarðar frá Alþjóðlegu geimstöðinni. Þeirra er að vænta í kvöld og gangi allt að óskum verður þetta í fyrsta skipti sem bandarískt geimfar flytur menn út í geim og til baka frá því að geimskutluáætlunin leið undir lok fyrir tæpum áratug.

Lendingarstaður þeirra Doug Hurley og Bob Behnken verður í Mexíkóflóa utan við vesturströnd Flórída, fjarri leið fellibyljarins Isaiasar sem stefnir á austurströnd ríkisins, að sögn breska ríkisútvarpsins BBC. Áætluð lending er klukkan 18:40 að íslenskum tíma.

Ferð tvímenninganna er söguleg því þetta er í fyrsta skipti sem menn fara út í geim með einkafyrirtæki. Þetta er jafnframt fyrsta bandaríska mannaða geimferðin frá því að síðasta geimskutlan lenti árið 2011. Síðan þá hafa Bandaríkjamenn þurft að leigja sér far um borð í rússneskum Soyuz-geimferjum til að komast til Alþjóðlegu geimstöðvarinnar á braut um jörðu.

Bandaríska geimvísindastofnunin NASA réði einnig Boeing til að smíða ferju til að koma geimförum hennar til geimstöðvarinnar. Boeing hefur lent í töfum vegna tæknilegra vandamála.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.