Viktor óbrotinn en missir af leikjum - Með fimm mörk í júlí

Viktor Jónsson meiddist í ökkla um leið og hann skoraði fyrir ÍA gegn Breiðabliki í Pepsi Max-deildinni á sunnudag. Hann er óbrotinn en kemur til með að missa af nokkrum leikjum.

Þetta staðfesti Jóhannes Karl Guðjónsson, þjálfari ÍA, í samtali við Vísi í dag. Viktor skoraði þriðja mark ÍA, í 5-3 tapi, á 54. mínútu en varð svo að fara meiddur af velli. Atvikið má sjá hér að neðan.

Þetta er mikið áfall fyrir Viktor og Skagaliðið en Viktor skoraði fimm mörk í júlímánuði, í sex deildarleikjum. Aðeins Thomas Mikkelsen hjá Breiðabliki hefur skorað fleiri mörk í mánuðinum, eða sjö.

„Viktor fór í röngtenmyndatöku í gær og er alla vega ekki brotinn. Það er alla vega jákvætt. En hann þarf að fara í segulómun svo við vitum ekki meira á þessari stundu,“ sagði Jóhannes Karl. Segulómun ætti að leiða í ljós hvort og þá hversu alvarlega liðbönd í ökklanum hafa skaddast.

„Hann mun missa af einhverjum leikjum, ég held að það sé nokkuð ljóst, en ég veit ekki hversu mikið eða lítið þetta er,“ sagði Jóhannes Karl.