Erlent

Loka fylkjamörkum milli Viktoríu og Nýju Suður-Wa­les

Atli Ísleifsson skrifar
Flugleiðin milli Melbourne og Sydney í Nýju Suður-Wales er ein sú fjölfarnasta í heimi.
Flugleiðin milli Melbourne og Sydney í Nýju Suður-Wales er ein sú fjölfarnasta í heimi. Getty

Yfirvöld í Ástralíu hafa lokað fylkjamörkunum milli Viktoríu og Nýju- Suður-Wales, tveggja fjölmennustu fylkja landsins, eftir að mikil fjölgun hefur orðið í tilfellum nýrra kórónuveirusmita í Melbourne.

Nokkur hundruð nýrra smita hafa komið upp í stórborginni, sem er að finna í Viktoríu, á síðustu tveimur vikum. Hafa um 95 prósent af nýjum smitum í Ástralíu síðustu vikurnar komið upp í Melbourne.

Viktoría og Nýja Suður-Wales hafa til þessa haldið mörkunum opnum, þrátt fyrir að önnur fylki hafi haldið sínum lokuðum. Nú þarf fólk sérstakt leyfi frá yfirvöldum til að fá að ferðast milli fylkjanna.

Daniel Andrews, forsætisráðherra Viktoríu, segir að um sameiginlega ákvörðun hans, Scott Morrison, forsætisráðherra landsins, og Gladys Berejiklian, forsætisráðherra Nýju Suður-Wales, hafi verið að ræða.

Andrews gaf engar vísbendingar um hvenær mætti eiga von á því að fylkjamörkin yrðu opnuð á ný, en í frétt BBC segir að flugleiðin milli Melbourne og Sydney í Nýju Suður-Wales sé ein sú fjölfarnasta í heimi.

Ástalir hafa fyrst og fremst glímt við smit sem hafa komið til landsins með fólki erlendis frá, en að undanförnu hefur um 80 prósent nýrra smitast flokkast sem innanlandssmit.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×