Sigurmark Eiðs Smára kom Chelsea á bragðið

José Mourinho tók við Chelsea sumarið 2004 og vann deildina strax á sínu fyrsta tímabili. Liðið hóf tímabilið á því að fá Sir Alex Ferguson og lærisveina hans í Manchester United í heimsókn. Chelsea fór með 1-0 sigur af hólmi þökk sé mari Eiðs Smára Guðjohnsen snemma leiks og þar með var grunnurinn að fyrsta deildartitli Chelsea í hálfa öld lagður.

Ásamt Mourinho voru sex leikmenn Chelsea að spila sinn fyrsta leik fyrir félagið. Þeir Petr Cech, Paulo Ferreira, Alexey Smertin og Didier Drogba voru allir í byrjunarliði Chelsea þann daginn. Þá komu þeir Ricardo Carvalho og Mateja Kezman inn af varamannabekknum.

Leikurinn var stál í stál frá upphafi til enda og mark Eiðs Smára strax á 14. mínútu var í raun hápunktur leiksins. Leikurinn fer seint í sögubækur fyrir skemmtun en það er ekki hægt að vanmeta mikilvægihans. Bæði fyrir Chelsea og Mourinho sem kom eins og stormsveipur inn í deildina á þessum tíma.

Drogba skallaði knöttinn fyrir fætur Eiðs sem náði að lyfta honum yfir Tim Howard í marki Man Utd og íslenski framherjinn náði í kjölfarið á einhvern ótrúlegan hátt að hindra Roy Keane, fyrirliða gestanna, frá því að hreinsa áður en boltinn skoppaði yfir línuna. 

Ekki flottasta mark sem Eiður skoraði í treyju Chelsea en líklega eitt það mikilvægasta. Lagði þetta grunninn að frábæru tímabili liðsins og segja má að þessi leikur hafi verið lýsandi fyrir leiktíðina í heild sinni.

Liðið vann deildina með 12 stiga mun en Chelsea nældi sér í 95 stig á meðan Arsenal var í 2. sæti með 83. Þá skoraði liðið 72 mörk og fékk aðeins á sig 15.

Alls lék Eiður 57 leiki fyrir Chelsea á leiktíðinni, þar af 37 í deild. Aðeins Frank Lampard skoraði fleiri mörk en Eiður í deildinni, munaði einu marki á þeim félögum. Lampard með 13 á meðan Eiður skoraði 12.