Fjölskylda Milly Dowler fær milljónir frá Murdoch

Fjölskylda Milly Dowler, skólastúlkunnar sem var myrt í Bretlandi árið 2002, mun fá tvær milljónir punda, eða 370 milljónir íslenskra króna í bætur frá fjölmiðlarisanum News International. Mál Dowler komst aftur í heimsfréttirnar í sumar þegar í ljós kom að blaðamenn News of the World höfðu brotist inn í talhólf hennar á meðan hennar var enn leitað, og eytt út skilaboðum úr símanum.

Þetta olli því að fjölskyldan hélt að hún væri enn á lífi. Hún fannst síðar látin. Fréttastofa Sky segir að nú hafi News international, sem gaf út News of the World sæst á að borga fjölskyldunni skaðabætur.

Til viðbótar mun eigandinn Rupert Murdoch styrkja góðgerðarsamtök um eina milljón punda eða um 190 milljónir króna vegna málsins.