Mancini: Tevez gæti spilað með City eftir tvær vikur

Roberto Mancini, stjóri Manchester City, hefur samþykkt afsökunarbeiðni Carlos Tevez og virðist vera farinn að hugsa alvarlega um það hvenær argentínski framherjinn kemur aftur inn í liðið ef marka má yfirlýsingar Ítalans eftir 4-0 stórsigur á Porto í gær.

„Ég er ánægður með það sem Carlos sagði og ég vil tala við hann á morgun (í dag)," sagði Roberto Mancini. Tevez gaf út einlæga afsökunarbeiðni í gær og hætti að berjast á móti sektinni frá Manchester City fyrir að hafa stungið af til Argentínu.

„Ég samþykki þessa afsökunarbeiðni og það er möguleiki á að hann spili aftur fyrir Manchester City. Ég held að hann þurfi tvær eða þrjár vikur til að koma sér í form og þá gæti hann spilað aftur fyrir liðið," sagði

Mancini.

„Carlos þekkir liðið mjög vel en liðið hefur spilað mjög vel undanfarna mánuði og er á toppi ensku úrvalsdeildarinnar. Carlos er samt frábær framherji sem getur hjálpað okkur síðustu tvo mánuði leiktíðarinnar," sagði Mancini.