Það vilja allir sparka í Januzaj

David Moyes, stjóri Man. Utd, var allt annað en kátur með meðferðina sem ungstirnið hans, Adnan Januzaj, fékk hjá leikmönnum Aston Villa um helgina.

Moyes segir að andstæðingar Man. Utd hiki ekki við að fara illa með Januzaj og sparki mikið í hann. Hann óskar eftir meiri vernd frá dómurum áður en illa fer.

"Ég veit ekki hversu oft er sparkað í hann í hverjum einasta leik. Það fer í taugarnar á mér hvað hann fær litla vernd. Það kemur að því að hann meiðist," sagði Moyes.

"Það er skelfilegt að sjá hvað leikmenn andstæðinganna fá að komast upp með gegn honum. Andstæðingarnir standa nánast í röð og bíða eftir því að fá að sparka í hann. Þeir voru fjölmargir sem spörkuðu í hann um helgina."