Heiðar lagði upp þrjú í sigri Cardiff

Heiðar Helguson var allt í öllu hjá Cardiff sem vann stórsigur 4-1 gegn Blackburn á Ewood Park í Championship-deildinni í knattspyrnu í kvöld.

Gestirnir frá Wales leiddu 1-0 í hálfleik en Norðmaðurinn Joshua King jafnaði metin snemma í síðari hálfleik. Þá var komið að Heiðari Helgusyni. Heiðar lagði á frábæran hátt upp mark fyrir Craig Bellamy á 56. mínútu en Dalvíkingurinn var hvergi nærri hættur.

Heiðar skallaði boltann fyrir fætur Joe Mason sem skoraði þriðja mark gestanna og mínútu síðar naut varamaðurinn Kim Bo-Kyung góðs af snilli Heiðars. Suður-Kóreubúinn skoraði fjórða markið og gulltryggði sigur Cardiff.

Heiðari var skipt af velli í viðbótartíma en um heiðursskiptingu hlýtur að hafa verið að ræða.

Með sigrinum náði Cardiff fjögurra stiga forystu á toppi Championship-deildarinnar. Crystal Palace, sem situr í öðru sæti, á þó leik til góða. Aron Einar Gunnarsson sat allan tímann á bekknum hjá velska liðinu en landsliðsfyrirliðinn glímir við bakmeiðsli.