Hóf skothríð í dómssal

Þrír létust í réttarsal í smábænum Reggio Emilia á Norður-Ítalíu í dag þegar óður maður dró upp byssu og hóf skothríð.

Byssumaðurinn, Klirim Fejzo, var í réttarsalnum að hlýða á framburð fyrrverandi konu sinnar í skilnaðarmáli þeirra tveggja þegar hann hóf skothríðina.

Fejzo skaut fyrrverandi konu sína og bróður hennar til bana áður en hann varð sálfur fyrir skoti lögreglumanns sem var í réttinum.

Lögreglumaðurinn og verjandi konunnar særðust lítillega en eru ekki í lífshættu.

Að sögn ANSA fréttastofunnar hét konan sem lést Vyosa Demcolli. Bróðir hennar hét Arjan Demcolli. Þau, ásamt byssumanninum, eru öll af albönsku bergi brotin.

Lögregla rannsakar nú hvernig byssumaðurinn náði að koma skotvopni inn í réttarsalinn.