Hvað á fyrirbærið að heita? „Klopp O'Clock“ eða „Kloppage time“

Liverpool liðið hefur nú komið til baka í fjórum leikjum á stuttum tíma og það er ekkert skrýtið að menn séu farnir að bera þetta Liverpool lið saman við Fergie-tímann á níunda og tíunda áratugnum.

Liverpool er með sex stiga forystu í ensku úrvalsdeildinni eftir leiki helgarinnar en á 86 mínútu leiks liðsins á móti Aston Villa leit út fyrir að liðið færi bara með þriggja stiga forystu inn í stórleikinn á móti Manchester City um næstu helgi.

Það boðar kannski ekki gott að Liverpool liðið sé farið að stunda það að bjarga sér fyrir horn en það sýnir jafnframt karakter og styrk að ná því leik eftir leik. Heppni eða hæfileikar, það verður alltaf stóra spurningin.

Fergie Time is dead, long live Klopp O'Clock, writes @NeilHumphreys#Fergietime#Liverpool#Klopphttps://t.co/h7SRZThIax

— The New Paper (@thenewpaper) November 4, 2019

Margir knattspyrnusérfræðingar eru að velta þessum endurkomum Liverpool liðsins fyrir sér eftir enn eina slíka á móti Aston Villa á Villa Park um helgina.

Liverpool skoraði þá sigurmarkið á fjórðu mínútu í uppbótatíma en markaskorarinn Sadio Mane hafði einnig skorða sigurmark á móti Leicester City á fimmtu mínútu í uppbótatíma fyrir ekki svo löngu síðan.

Hugtakið Fergie-tími er vel þekkt meðal knattspyrnuáhugamanna enda snéru lið Sir Alex Ferguson oft við leikjum á lokamínútunum á gullaldarárum United liðsins undir stjórn Skotans sigursæla. Fergie-tími var líka tilraun til að lýsa pressunni sem lið Sir Alex setti á mótherja sína þegar liðið þurfti mörk á lokamínútum leikja.

James - Forget Fergie time. Liverpool leave it late again to strike in Kloppage time! https://t.co/E7KJ5e8Brwpic.twitter.com/ZNvAJKbk6d

— Aston Villa All News (@AVFCAllNews) November 4, 2019

Það er einmitt þessi pressa sem menn sjá svo greinilega í síðustu leikjum Liverpool. Liðið hefur sett allt á fullt í lok leikjanna og það hefur skilað liðinu mörgum stigum og þar með sex stiga forystu á toppi ensku úrvalsdeildarinnar.

Það væri vissulega auðveldast að breyta bara Fergie-tíma í Klopp-tíma til að búa til viðurnefni fyrir endurkomur Liverpool liðsins í vetur en menn vilja þó vera eitthvað frumlegri en það.

Margir pennar hafa velt því fyrir sér hvað þetta fyrirbæri eigi að heita. Tvær skemmtilegustu tillögurnar eru kannski að kalla þetta „Klopp O'Clock“ eða „Kloppage time“ upp á ensku. Báðar eru þetta skemmtilegar útfærslur á enskri tungu sem ensku blöðin munu eflaust nýta sér haldi Liverpool áfram að breyta töpum í jafntefli og sigra.

Hér fyrir neðan má sjá aðeins meira um endurkomur Liverpool á leiktíðinni.

Endurkomur Liverpool liðsins í ensku úrvalsdeildinni á tímabilinu:

14. september á móti Newcastle

- lenti 1-0 undir á 7. mínútu en vann leikinn 3-1 (+ 3 stig)

20. október á móti Manchester United

- lenti 1-0 undir á 36. mínútu en náði 1-1 jafntefli (+ 1 stig)

27. október á móti Tottenham

- lenti 1-0 undir á 1. mínútu en vann leikinn 2-1 (+ 3 stig)

2. nóvember á móti Aston Villa

- lenti 1-0 undir á 21. mínútu en vann leikinn 2-1 (+ 3 stig)



Mikilvæg mörk Liverpool liðsins í blálokin í nokkrum leikjum á tímabilinu:

90.+5 mín. - Sadio Mane með sigurmark á móti Leicester City

85. mín. -  Adam Lallana með jöfnunarmark á móti Manchester United

87. mín. - Andrew Robertsson með jöfnunarmark á móti Aston Villa

90.+4 mín. - Divock Origi með jöfnunarmark á móti Arsenal (deildabikar)

90.+4 mín. - Sadio Mane með sigurmark á móti Aston Villa