Innlent

Kraftmeiri stormur í kortunum á sunnudag

Kristín Ólafsdóttir og Margrét Helga Erlingsdóttir skrifa
Búast má við stormi um mestallt land á sunnudag.
Búast má við stormi um mestallt land á sunnudag. Vísir/vilhelm

Það brestur á með suðaustanstormi um landið suðvestanvert og á miðhálendinu í dag. Gul veðurviðvörun hefur verið virkjuð á allstóru svæði en kraftmeiri stormur er þó í kortunum fyrir sunnudag.

Gul veðurviðvörun er í gildi fyrir landið suðvestanvert, Faxaflóasvæðið og miðhálendið í dag.

„Það er vaxandi suðaustanátt hjá okkur og gular viðvaranir á Suðurlandi og Faxaflóa, einnig á höfuðborgarsvæðinu og á miðhálendinu. Það er hvassast undir Eyjafjöllum á Kjalarnesi og Hafnarfjalli og svo verður einnig mjög hvasst við fjöll á suðvestanverðu hálendinu. Þetta tekur gildi núna upp úr hádeginu og er alveg til fyrramáls,“ segir Helga Ívarsdóttir, veðurfræðingur hjá Veðurstofu Íslands.

Útlit er fyrir að bæti jafnt og þétt í vind í dag og verður orðið bálhvasst í kvöld.

„Það bætir í vind en er mismunandi hvenær er hvassast. Til dæmis verður hvassast á Kjalarnesi um miðja nótt og einnig undir Hafnarfjalli og í Borgarnesi en svo lægir nokkuð rösklega seint í nótt og snemma í fyrramálið.“

Helga segir að gott sé að binda niður lausamuni og fara að öllu með gát. Á laugardag er óhætt að segja að verði stund milli stríða því á sunnudag tekur að hvessa á ný.

„Þá er aftur vaxandi vindur hjá okkur og það verður jafnvel meiri veðurhæð heldur er í dag og má búast við stormi um mestallt land. Fólk ætti að fylgjast vel með veðurspánni fyrir sunnudag.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.