Enn einn varnarmaður City meiddur

Meiðsladraugurinn heldur áfram að ásækja varnarmenn Manchester City.

Úkraínski vinstri bakvörðurinn Oleksandr Zinchenko var sá síðasti til að meiðast. Hann gekkst undir aðgerð á hné í Barcelona í vikunni.

Ekki liggur fyrir hversu alvarleg meiðslin eru en Zinchenko verður væntanlega frá keppni næstu vikurnar.

Franski miðvörðurinn Aymeric Laporte spilar ekki aftur fyrr en á næsta ári og óvíst er hvort spænski miðjumaðurinn Rodri, sem hefur leyst af í vörninni í síðustu leikjum City, verði með gegn Aston Villa á morgun.

Miðverðirnir John Stones og Nicolás Otamendi hafa einnig glímt við meiðsli á þessu tímabili sem og vinstri bakvörðurinn Benjamin Mendy.

City er í 2. sæti ensku úrvalsdeildarinnar eftir níu umferðir. Með sigri á Villa á morgun minnka meistararnir forskot toppliðs Liverpool niður í þrjú stig.