Mikilvægara að þróa liðið en vinna titil

Þróun Manchester United sem liðs undir stjórn Ole Gunnar Solskjær er mikilvægari heldur en að reyna að ná í titla. Þetta segir knattspyrnusérfræðingurinn og fyrrum United maðurinn Gary Neville.

Neville er sparksérfræðingur hjá Sky Sports og sagði hann í uppgjörsþætti stöðvarinnar hversu mikilvægt það er fyrir United að þróast í rétta átt.

United byrjaði tímabilið í ensku úrvalsdeildinni af krafti með 4-0 sigri á Chelsea en hefur síðan tapað fyrir Crystal Palace, gert jafntefli við Wolves og Southampton og svo vann liðið Leicester í síðustu umferð.

„Það eina við þetta United lið í ár er að þeir eru allir að reyna að horfa í rétta átt,“ sagði fyrrum bakvörðurinn.

„Ég fagna því hvað United gerði í sumar. Það lítur út fyrir að þeir séu komnir aftur með plan á félagsskiptamarkaðnum, plan um að kaupa unga og efnilega breska leikmenn, koma með leikmenn upp úr akademíunni og bera kennsl á erlendar stjörnur.“

„Mér finnst United hafa tekið skref aftur á bak en samt í rétta átt til þess að geta farið áfram. Það er komið nóg af því að fá inn 30 ára gamla leikmenn sem passa ekki inn í leikkerfið.“

Eftir sex, sjö ár af lélegri stefnu í leikmannamálum segir Neville það ómögulegt fyrir United að fara allt í einu að berjast um Englandsmeistaratitilinn.

„Eitt af efstu fjórum sætunum væri mjög ásættanlegur árangur. Það er staðan sem Manchester United er í.“