Erlent

Fimm nú sagðir látnir í eldflaugarslysi í Rússlandi

Kjartan Kjartansson skrifar
Varnarmálaráðuneyti Rússlands hefur verið fámált um sprenginguna í Archangelsk-héraði í gær.
Varnarmálaráðuneyti Rússlands hefur verið fámált um sprenginguna í Archangelsk-héraði í gær. Vísir/Getty

Kjarnorkustofnun Rússlands segir að fimm starfsmenn hennar hafi látið lífið þegar eldflaugarhreyfill sprakk á æfingastöð hersins í norðanverðu landinu í gær. Upphaflega sögðu yfirvöld að tveir hefðu látist í slysinu. Geislavirkni jókst í skamman tíma í nærliggjandi borg eftir sprenginguna.

Þrír til viðbótar eru sagðir hafa slasast í sprengingunni sem varð við tilraun á eldflaugarhreyfli með fljótandi eldsneyti, að því er segir í frétt Reuters.

Rússneska varnarmálaráðuneytið hefur lítið tjáð sig um slysið. Það hélt því fram að engin eitur- eða geislavirk efni hefðu losnað í sprengingunni. Engu að síður greindu yfirvöld í borginni Severodvinsk frá því að þar hefði mælst aukin geislavirkni í skamman tíma. Sú tilkynning hvarf skyndilega af netinu í dag án skýringar. Engin opinber skýring hefur verið gefið á aukinni geislavirkni.

Níu manns slösuðust í annarri sprengingu í herstöð nærri borginni Atsjinsk í austurhluta Síberíu. Varnarmálaráðuneytið heldur því fram að eldingar hafi valdið sprengingunni, að sögn AP-fréttastofunnar. Einn lést og þrettán særðust í miklum sprengingum á sama stað á mánudag.




Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.