Önnur Catalina lenti óvænt í Reykjavík
Catalina-flugbátur úr síðari heimsstyrjöld birtist óvænt í Reykjavík síðdegis. Tók hann tignarlegan hring yfir borginni áður en hann lenti á Reykjavíkurflugvelli um hálfsexleytið. Áformað er að vélinni verði flogið áleiðis til Grænlands á morgun.
Flugáhugamenn töldu í fyrstu að þetta hlyti að vera sama Katalína og hafði viðkomu á flugsýningunni fyrir hálfum mánuði á leið sinni vestur um haf en væri núna á leið til baka frá Bandaríkjunum. Þetta er hins vegar önnur vél, smíðuð árið 1943, fyrir kanadíska flugherinn, en sú fyrri er frá árinu 1941 og sú elsta flughæfa sem til er.
Svo skemmtilega vill til að þessi, rétt eins og sú fyrri, var einnig staðsett á Reykjavíkurflugvelli á stríðsárunum, frá 1943 til 1945. Þessi náði þá að granda einum þýskum kafbáti, U-342, suðvestur af landinu þann 17. apríl árið 1944. Sú fyrri grandaði þremur kafbátum við Ísland.
Líklegt er að fara þurfi marga áratugi aftur í tímann til að finna dæmi um tvær Katalínur millilenda í Reykjavík á sama sumri. Sjaldgæft er orðið að svo fágætum forngripum sé flogið yfir Atlantshafið enda eru aðeins um tuttugu eintök eftir í heiminum í flughæfu ástandi. Á undan þessum kom Catalina síðast til landsins sumarið 2012 en þá hafði slík vél ekki sést í Reykjavík á þessari öld.
Koma Katalínunnar í dag var óvænt og var ekki óskað eftir því að hún fengi afgreiðslu hérlendis fyrr en í morgun. Sex manns eru um borð en vélin ber skrásetningarnúmerið N9767. Verið er að ferja hana frá Frakklandi til vesturstrandar Bandaríkjanna en í þessum áfanga var hún að koma frá flugvellinum í Wick í Skotlandi.
Vélin var áður í eigu sérstaks sjóðs um varðveislu hennar og hefur verið staðsett á flugvelli suðaustur af París en var nýlega seld til einstaklings í Bandaríkjunum. Nýi eigandinn er um borð og kvaðst hann í samtali við fréttamann á Reykjavíkurflugvelli í kvöld vera að ferja hana til nýrra heimkynna í Oregon. Þar verður hún höfð til sýnis og flogið á flugsýningum en um sögu hennar má nánar fræðast hér.
Áhöfnin hyggst hvílast í Reykjavík í nótt. Á morgun áformar hún að fljúga vélinni til Narsarsuaq, síðan til Goose Bay og um Ontario áfram til Oregon.
Catalina-flugbátar mörkuðu djúp spor í flugsögu Íslands, eins og sagt var frá í þessari frétt Stöðvar 2 frá árinu 2012:
Tengdar fréttir
Loftbelgurinn flaug bara örstutt í kvöld
Loftbelgurinn, sem kominn er til landsins vegna flugsýningarinnar í Reykjavík á morgun, fór aftur á loft í kvöld, í tengslum við beina útsendingu í fréttum Stöðvar 2.
Vélin var notuð við kafbátaleit og til að verja skipalestir hér við land
Elsti flughæfi flugbáturinn sem staðsettur var á Íslandi í síðari heimstyrjöldinni endurnýjaði kynni sín við landið þegar vélin lenti á Reykjavíkurflugvelli í dag.
Katalínan lendir á Þingvallavatni
Áhöfn Catalina-flugbátsins, sem lenti í Reykjavík í dag, eftir nærri sex tíma flug frá Skotlandi, ákvað óvænt á fjórða tímanum að fara í útsýnisflug um suðvesturhornið.
Fljúgandi skókassar, óvæntur þristur og loftbelgur – allt að gerast yfir Reykjavík í kvöld
Það er ekki aðeins að Catalina hafi lent í borginni í dag, - það hefði þurft fjörugt ímyndunarafl til að láta sig dreyma um öll þau fjölbreyttu flugför sem sést hafa á Reykjavíkurflugvelli síðustu klukkustundir.
Elsta flughæfa Katalínan væntanleg til Reykjavíkur
Flugveislan í Reykjavík heldur áfram. Á morgun er væntanlegur enn einn dýrgripurinn, Catalina-flugbátur, sem staðsettur var á Íslandi í síðari heimsstyrjöld.
Þristarnir streyma inn til Reykjavíkur
Alls fjórtán flugvélar frá stríðsárunum, svokallaðir þristar, millilenda á Íslandi næstu tvo sólarhringa á leið sinni frá Bandaríkjunum til Evrópu til að minnast innrásarinnar í Normandí.
Flugkappar í útsýnisflugi með Catalina flugbáti
Þrír flugkappar fengu að fara í útsýnisflug með Catalina flugbáti yfir Reykjavík í dag. Kapparnir eiga það sameiginlegt að hafa flogið slíkum vélum þegar þær voru notaðar til farþegaflugs hér á landi á árunum eftir stríð.
Catalina markaði djúp spor í flugsögu Íslands
Íslenskir flugáhugamenn fá langþráðan draum uppfylltan á Reykjavíkurflugvelli um helgina; að skoða Catalina-flugbát en þessar vélar hafa markað hvað dýpst spor í íslenska flugsögu. Íslendingar kynntust Catalinum fyrst á stríðsárunum þegar þær gegndu lykilhlutverki í hernaði Bandamanna gegn kafbátum Þjóðverja á Atlantshafinu.
