Innlent

Þristarnir streyma inn til Reykjavíkur

Kristján Már Unnarsson skrifar
Tómas Dagur Helgason, formaður Þristavinafélagsins, á Reykjavíkurflugvelli í dag.
Tómas Dagur Helgason, formaður Þristavinafélagsins, á Reykjavíkurflugvelli í dag. Vísir/Vilhelm.

Alls fjórtán flugvélar frá stríðsárunum, svokallaðir þristar, millilenda á Íslandi næstu tvo sólarhringa á leið sinni frá Bandaríkjunum til Evrópu til að minnast innrásarinnar í Normandí. Fjallað var um viðburðinn í fréttum Stöðvar 2.

Þrjár flugvélanna lentu í Reykjavík í kvöld eftir flug frá Grænlandi en þeirri fjórðu var beint til Keflavíkur þegar séð varð að hún myndi ekki ná inn fyrir lokunartíma Reykjavíkurflugvallar klukkan 23 og Samgöngustofa hafnaði að veita undanþágu. Síðdegis á morgun er svo von á næsta hópi, fimm til sex flugvélum.

Þristunum er lagt norðan við Loftleiðahótelið. Þeir eru ýmist af hernaðarútgáfunni C-47 eða borgaralegu útgáfunni DC-3. Stöð 2/KMU.

Fyrsta flugvélin lenti raunar í gærkvöldi og hélt síðan áfram för til Bretlandseyja í dag en hún þjónar hlutverki sem undanfari flugsveitarinnar, að því er fram kom í viðtali við Robert S. Randazzo, flugstjóra og eiganda. Robert segir að fimm ára undirbúningsvinna liggi að baki þessum leiðangri, bæði flókin og erfið. 

„Ég er viss um að þegar þetta er afstaðið muni ég hugsa um þetta sem eina bestu upplifun lífs míns. Við höfum heimsótt staði sem voru frægir á meðal flugáhafna í síðari heimsstyrjöldinni og við fáum að upplifa þessa reynslu. Þetta er ólíkt öllu sem við höfum gert áður,“ sagði Robert meðal annars.

Robert S. Randazzo, flugstjóri og eigandi DC-3 vélarinnar Clipper Tabitha May. Vísir/Vilhelm.

Tómas Dagur Helgason, formaður Þristavinafélagsins, tók undir það að flugáhugamenn héldu varla vatni yfir þessari flugkomu. Þristurinn væri ein af merkustu flugvélum, sem framleiddar hefðu verið, og hefði komið fótunum undir mörg af helstu flugfélögum heims. 

Hann sagði að menn skyldu einnig hafa það í huga að í dag væru aðeins um 120 þristar flughæfir í heiminum. Að fá núna fjölda þeirra til Reykjavíkurflugvallar væri einstakt.

Þrír þristar saman á Reykjavíkurflugvelli í kvöld. Annaðkvöld geta menn átt von á að sjá þar 10-11 þrista saman. Stöð 2/KMU.

Tómas sagði núna unnið hörðum höndum að því á Akureyri að lagfæra bilun í öðrum hreyfli íslenska þristsins Páls Sveinssonar í von um hann komist suður til Reykjavíkur til móts við hina þristana. 

Þá kom fram í viðtalinu að almenningi yrði líklega gefinn kostur á því að skoða flugvélarnar á Reykjavíkurflugvelli á miðvikudag. 

Hér má sjá frétt Stöðvar 2:


Tengdar fréttir

Þristarnir áætla lendingu klukkan 20.30 í Reykjavík

Fjórir þristar úr flugsveitinni, sem er á leið yfir Atlantshafið, eru nú á flugi til Reykjavíkur frá Narsarsuaq á Grænlandi. Tveir þeir fyrstu áætla lendingu klukkan 20.30 á Reykjavíkurflugvelli, sá þriðji áætlar lendingu klukkan 21.30 en sá fjórði klukkan 23.15.

Tvísýnt hvort þristarnir nái til Reykjavíkur fyrir næturlokun

Óvíst er nú hvort flugsveit gömlu stríðsáraþristanna, sem er á leið yfir Atlantshafið, nái til Reykjavíkurflugvallar áður en næturlokun flugvallarins tekur gildi klukkan 23 í kvöld. Því gæti svo farið að flugvélarnar neyðist til að lenda í Keflavík.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.