Enski boltinn

„Solskjær er ein besta manneskja sem ég hef hitt í fótboltanum“

Óskar Ófeigur Jónsson skrifar
Ander Herrera fær skilaboð frá Ole Gunnari Solskjær.
Ander Herrera fær skilaboð frá Ole Gunnari Solskjær. Getty/Tom Purslow
Ander Herrera fer fögrum orðum um norska knattspyrnustjórann Ole Gunnar Solskjær en varar við því að það gæti tekið langan tíma að koma Manchester United aftur á toppinn.

Spænski miðjumaðurinn er á förum frá Manchester United eftir fimm ár hjá félaginu.

Endir Ander Herrera hjá Manchester United var ekki glæsilegur því liðið vann aðeins tvo af síðustu tíu leikjum sínum á leiktíðinni og endaði jafnlangt (í stigum) frá því að vinna deildina og falla úr henni.





Hinn 29 ára gamli Ander Herrera trúir því að Ole Gunnar Solskjær sé rétti maðurinn í starfið en segir að það muni taka sinn tíma að koma United aftur í hóp bestu liðanna í ensku úrvalsdeildinni..

„Ég hef mikla trú á Ole og ég hef líka trú á Michael [Carrick], Kieran [McKenna], Mike Phelan og Demps [Mark Dempsey]. Það breytir ekki því að þeirra bíður erfitt starf. Það er skoðun mín sem stuðningsmanns og manns sem þekkir félagið vel,“ sagði Ander Herrera við Guardian.

Búist er við því að Ander Herrera gangi til liðs við Paris Saint-Germain í sumar. Hann segir að Manchester United ætti að skoða það hvernig Liverpool kom sér aftur upp í hóp bestu liða deildarinnar.

„Félagið mun þurfa tíma, sjálfstraust og stuðning. Ég er viss um að þeir fái það en það eina sem ég bið sérstaklega um er tími. Þetta verður ekki auðvelt. Liverpool mun væntanlega vinna Meistaradeildina en ég er að fara frá Manchester United og Liverpool hefur ekki unnið titil þessi fimm ár sem ég hef verið hér. Þeir hafa unnið ótrúlegt starf þar en stuðningsmennirnir hafa líka gefið þeim tíma. Það er það sem Manchester United þarf núna,“ sagði Ander Herrera.





„Ég er viss um að United þurfi ekki að bíða í 30 ár eftir titlinum af því að Solskjær er rétti maðurinn í starfið. Ég vona að Manchester United vinni titilinn á næsta tímabili en ég held að liðið þurfi aðeins lengri tíma,“ sagði Herrera.

Herrera talar einstaklega vel um Norðmanninn Ole Gunnar Solskjær.

„Hann er ein besta manneskja sem ég hef hitt í fótboltanum. Allir í klefanum elska hann. Allir vilja berjast fyrir hann. Þegar þú hefur menn sem vilja berjast fyrir þig þá er stór hluti starfsins að baki. Ég trúi á karma og ef þú ert góð manneskja, hreinskilinn og einlægur við leikmenn og stuðningsfólk þá mun það skila árangri á endanum,“ sagði Herrera.







Enski boltinn

Mest lesið


Fleiri fréttir

Sjá meira


×

Mest lesið