United búið að spyrjast fyrir um Sessegnon

Manchester United er búið að hafa samband við Fulham um möguleg kaup á Ryan Sessegnon samkvæmt heimildum Sky Sports.

Fulham féll úr ensku úrvalsdeildinni í vor og því er næsta víst að Lundúnaliðið mun ekki halda í hinn unga Sessegnon en bæði Juventus og Tottenham eru einnig sögð hafa áhuga á honum.

Manchester United er þó eina félagið sem hefur haft samband við Fulham vegna Sessegnon, en hann heldur upp á nítján ára afmælið sitt í dag, laugardag.

Sessegnon var lykilmaður þegar Fulham kom upp úr Championshipdeildinni á síðasta tímabili en hann átti erfitt uppdráttar á sínu fyrsta tímabili í úrvalsdeildinni.

Hann skoraði tvö mörk og lagði upp sex í 35 leikjum í ensku úrvalsdeildinni í vetur en hann var inn og út úr byrjunarliðinu seinni hluta tímabilsins.

Samkvæmt frétt Sky eru forráðamenn Fulham tilbúnir að láta Sessegnon fara, það sé kominn tími til þess að hleypa honum á önnur og stærri mið.