Lingard og Martial gætu náð leiknum á móti Liverpool

Ole Gunnar Solskjær hefur heldur betur glatt stuðningsmenn Manchester United síðan að hann tók við liðinu eftir 3-1 tap United gegn Liverpool 17. desember á síðasta ári.

Hann hélt áfram að gleðja stuðningsmenn liðsins á blaðamannafundi sínum í morgun þegar að hann greindi frá því að Jesse Lingard og Anthony Martial gætu mögulega náð leiknum á móti Liverpool á sunnudaginn.

Martial og Lingard meiddust báðir í eina tapleik Solskjær til þessa þegar að United lá í valnum, 2-0, á heimavelli gegn PSG í Meistaradeildinni í síðustu viku en báðir þurftu að fara út af vegna meiðsla sinna. Talið var að þeir yrðu ekki með næstu vikurnar.

Solskjær sagði á blaðamannafundi sínum í morgun að Lingard væri kominn vel á veg en Martial væri tæpari. Þó væri góður möguleiki að báðir taki þátt í leiknum á sunnudaginn.

Manchester United þarf sárlega á stigunum að halda í baráttunni um Meistaradeildarsæti og Liverpool má ekki misstíga sig of mikið í harðri baráttu um Englandsmeistaratitilinn við Manchester City.

„Jesse lítur bara vel út en ég vona það besta með Anthony,“ sagði Ole Gunnar Solskjær á blaðamannafundi sínum í morgun.