Sögð þéna milljónir á því að sýna brjósta­haldarann á Ólympíu­leikunum

Hin 27 ára gamla Leerdam stóðst pressuna og blómstraði í sviðsljósinu en fáir keppendur á Ólympíuleikunum í Mílanó og Cortina kalla á jafnmikla athygli.

Erlendir fréttamiðlar eru uppteknir af Leerdam sem er með margar milljónir fylgjenda á samfélagsmiðlum. Þar er því meðal annars slegið upp í Expressen að það séu myndirnar eftir að hún kom í mark sem gera hana ríka.

Rétt eftir að Leerdam fór yfir marklínuna, í miðri sigurgleðinni, var eitt það fyrsta sem hún gerði að renna niður rennilásnum á búningnum sínum. Það var engin tilviljun.

Leerdam er styrkt af Nike og myndirnar þar sem hún sést í íþróttabrjóstahaldara frá merkinu voru strax deildar á Instagram-reikningi Nike sem hefur tæplega þrjú hundruð milljónir fylgjenda.

Landsliðsbúningur Hollands er styrktur af samkeppnisaðilanum Fila. Auglýsing Leerdam er leið til að fara fram hjá því til að ná fjárhagslegum ávinningi sem enginn annar á Ólympíuleikunum getur jafnað.

„Mig grunar að með Nike sé um að ræða upphæð yfir eina milljón dollara (sem samsvarar 123 milljónum íslenskra króna),“ sagði Frederique de Laat, stofnandi Branthlete sem sérhæfir sig í markaðssetningu og kveníþróttamönnum, við hollenska dagblaðið AD.

Hún er sögð þéna rúmar átta milljónir íslenskra króna fyrir hverja færslu. Leerdam fór sjálf yfir sex milljónir fylgjenda á Instagram meðan á Ólympíuleikunum stóð.

Að sögn Meindert Schut, aðalritstjóra viðskiptatímaritsins Quote, getur skautastjarnan þénað um 1 sent á hvern fylgjanda fyrir hverja styrkta Instagram-færslu. Í hennar tilfelli myndi það þýða yfir 8,2 milljónir íslenskra króna fyrir hverja styrkta færslu.

Hluta af athyglinni í kringum Leerdam má skýra með því að hún er trúlofuð hinum heimsþekkta hnefaleikaáhrifavaldi Jake Paul. Jake Paul styður Jutta Leerdam á staðnum á Ólympíuleikunum. Hann vill að þetta sé hennar síðasta keppni.

Í sjónvarpsþáttunum Paul American talaði kærastinn hennar um að hann vildi að hún hætti fljótlega á skautum svo þau gætu stofnað fjölskyldu.

„Við getum varla beðið til eftir Ólympíuleikunum 2026. Hún ætlar að vinna gull. Ég ætla að verða heimsmeistari það árið. Svo mun hún hætta og við munum eignast börn og stofna fjölskyldu,“ sagði Paul í þáttunum.

En Leerdam er ekki viss sjálf. Við fjölmiðla sagði hún þetta:

„Ég veit það satt að segja ekki. Ég reyni að láta þetta síga inn fyrst. Ég sé til í sumar hvað ég geri, en akkúrat núna er þetta í brennidepli. Þannig að ég finn enga pressu á að taka ákvörðun,“ sagði Leerdam.