FA vill sjá Mourinho refsað fyrir ummælin og ætlar að áfrýja

Enska knattspyrnusambandið ætlar að áfrýja úrskurðinum sem sagði Jose Mourinho ekki fá refsingu fyrir ummæli sín eftir leik Manchester United og Newcastle.

Knattspyrnusambandið fékk til sín varalesara til þess að greina hvað Portúgalinn sagði á móðurmálinu í sjónvarpsmyndavélar BT Sport. Varalesarinn sagði „fodas filhos de puta“ í átt að myndavélinni sem þýðir víst að hórusynir megi gjöra svo vel og fokka sér.

Málið fór fyrir sjálfstæða aganefnd. Mourinho bað Manchester United að verjast málinu þar sem hann telur sig ekki hafa sagt eða gert neitt refsivert. Vörn lögmanna United var nógu góð til þess að aganefndin ákvað að Mourinho yrði ekki refsað þar sem ekki var hægt að sanna sekt hans. 

Á næsta blaðamannafundi Mourinho eftir úrskurðinn sagði Portúgalinn að hann væri „100 prósent saklaus.“

Úrskurðurinn kom enska knattspyrnusambandinu í opna skjöldu þar sem sambandið tapar nær aldrei málum sem þessum.

Í dag sendi knattspyrnusambandið frá sér tilkynningu þar sem það sagðist ætla að áfrýja þessari ákvörðun eftir að hafa farið vel yfir skriflega útskýringu á úrskurðinum.

"Having carefully considered the Written Reasons of the Independent Regulatory Commission relating to the case involving José Mourinho, The FA can confirm it is appealing the decision.” pic.twitter.com/dbQlEFAwHl

— FA Spokesperson (@FAspokesperson) November 7, 2018