Zlatan færði Man Utd bikar

Þrátt fyrir að hafa bara spilað með Manchester United í sjö mánuði er Zlatan Ibrahimovic kominn í guðatölu á Old Trafford.

Zlatan tryggði United deildarbikarinn í gær þegar hann skoraði sigurmarkið gegn Southampton í úrslitaleiknum á Wembley. Zlatan skallaði þá boltann í netið af stuttu færi eftir fyrirgjöf Anders Herrera. Lokatölur 3-2, United í vil.

„Þetta er ástæðan fyrir því að ég koma, til að vinna og ég er að vinna. Því meira sem ég vinn því ánægðari verð ég,“ sagði Zlatan sem var alveg með það á hreinu deildarbikarinn væri titill númer 32 á hans glæsilega ferli.

Einhverjar efasemdaraddir heyrðust þegar hinn 35 ára Zlatan kom á frjálsri sölu til United. En hann hefur þaggað niður í þeim; spilar alla leiki og skorar í þeim flestum. „Ég spáði þessu. Margir héldu að ég gæti þetta ekki, en ég held bara áfram,“ sagði Zlatan sem er kominn með 26 mörk í öllum keppnum í vetur.

United átti undir högg að sækja í úrslitaleiknum gegn spræku liði Southampton. Zlatan kom United yfir með skoti beint úr aukaspyrnu á 19. mínútu. Sjö mínútum fyrir hálfleik tvöfaldaði Jesse Lingard forskotið en Ítalinn Manolo Gabbiadini minnkaði muninn í uppbótartíma fyrri hálfleiks.

Gabbiadini var svo aftur á ferðinni á 48. mínútu þegar hann jafnaði metin með skemmtilegu skoti. Hann hefur skorað fimm mörk í fyrstu þremur leikjum sínum fyrir Southampton. Gabbiadini var tekinn af velli á 83. mínútu og fjórum mínútum síðar skoraði Zlatan sigurmarkið og tryggði United fimmta deildarbikartitilinn í sögu félagsins.

„Í hreinskilni sagt vann hann leikinn fyrir okkur því hann var frábær. Í leik þar sem andstæðingurinn var betri en við á löngum köflum gerði hann gæfumuninn og færði okkur bikarinn,“ sagði José Mourinho um Zlatan eftir leik.

Portúgalinn varð í gær fyrsti stjórinn í 139 ára langri sögu Manchester United til að vinna titil á sínu fyrsta tímabili við stjórnvölinn hjá liðinu.