Alves tekur U-beygju og er á leið til PSG

Dani Alves er á förum til Paris Saint-Germain og verður væntanlega kynntur sem nýr leikmaður franska liðsins á morgun.

Mál Alves hafa tekið óvænta stefnu en flest benti til þess að hann myndi endurnýja kynnin við Pep Guardiola hjá Manchester City.

Alves mun skrifa undir tveggja ára samning við PSG en talið er að hann fái hærri laun þar en hann hefði fengið hjá City.

Enska liðið er í bakvarðaleit eftir að hafa látið Pablo Zabaleta, Bacary Sagna og Gaël Clichy fara eftir síðasta tímabil.

Talið er City reyni nú að ná samkomulagi við Tottenham um kaup á enska landsliðsbakverðinum Kyle Walker.

City er búið að kaupa tvo leikmenn í sumar; Bernando Silva frá Monaco og markvörðinn Ederson frá Benfica.