Giroud: Var nálægt því að fara

Oliver Giroud segist hafa komist nálægt því að yfirgefa herbúðir Arsenal í sumar. Eftir að hafa lagst undir feld með fjölskyldu sinni hafi hann hins vegar ákveðið að vera áfram í Lundúnum.

Mikið var rætt um framtíð Giroud í sumar, en Everton, West Ham og Marseille höfðu öll áhuga á franska landsliðsmanninum.

„Það er satt að ég var nálægt því að yfirgefa félagið. Ég hugsaði málið vel með fjölskyldu og nánustu vinum og ákvað að ég vildi vara áfram hjá Arsenal,“ sagði Giroud.

„Kafla mínum hjá Arsenal er ekki lokið. Félagið hefur gefið mér mikið og ég vil gefa til baka, bæta mig og vinna titla.“

Giroud hefur skorað 99 mörk fyrir Arsenal síðan hann kom til félagsins frá Montpillier árið 2012.

„Það eru forréttindi að spila fyrir Arsenal. Ég vona að ég nái 100 mörkum eins fljótt og hægt er. Fyrir framherja er mikilvægt að skora mörk.“