Klopp: Þurfum ekki miðvörð

Jurgen Klopp, knattspyrnustjóri Liverpool, segir að lið sitt þurfi ekki á nýjum miðverði á að halda.

Þessi orð koma mikið á óvart en Virgil van Djik, varnarmaður Southampton, hefur verið sterklega orðaður við Liverpool í allt sumar.

Í liði Liverpool eru nú þegar varnarmennirnir: Dejan Lovren, Joel Matip, Ragnar Klavan og Joe Gomez en Klopp lét hafa eftir sér eftir 3-1 sigur á Athletic Bilbao á dögunum að hann haldi að liðið þurfi ekki á öðrum miðverði að halda.

Klopp hefur fengið þrjá nýja leikmenn til sín í sumar en þeir Mohamed Salah, Dominic Solanke og Andy Robertson gengu allir til liðs við Liverpool í sumar og þýski þjálfarinn segir að hann sé ánægður með undirbúningstímabilið hjá liði sínu og að ungir leikmenn sem fengu tækifæri höfðu nýtt það vel.

Tímabilið í ensku úrvalsdeildinni hefur göngu sína um helgina  en þar munu lærisveinar Klopp mæta Watford á útivelli á laugardag.