Liðu aðeins níu mánuðir á milli þess að Ranieri tók á móti enska meistaratitlinum eftir ævintýrlegt ár með liði sem flestir spáðu fallbaráttu en voru að lokum krýndir enskir meistarar. Er um eitt ótrúlegasta íþróttaafrek í manna minnum að ræða en minni spámenn á borð við Vardy, Wes Morgan og Danny Drinkwater spiluðu eins og hershöfðingjar allt tímabilið.
Titilvörnin gekk hinsvegar ekki eins og í sögu en félagið var skyndilega búið að sogast niður í alvöru fallbaráttu og hefur ekki verið sjón að sjá leikmenn á borð við Vardy og Ryiad Mahrez.
Eftir 1-2 tap í Sevilla í vikunni var Ranieri sagt upp störfum og voru ensk blöð fljót að benda á sök leikmannana að þeir hefðu óskað eftir þessu en Vardy segir ekkert til í að hann hafi verið einn þeirra.
„Ég mun alltaf bera virðingu fyrir Claudio því það sem við afrekuðum saman var hið ómögulega. Hann hafði trú á mér og ég mun alltaf vera honum þakklátur. Sögusagnirnar um að ég hafi óskað eftir því að hann yrði rekinn eru ekki aðeins ósannar heldur einnig særandi,“ sagði Vardy og hélt áfram:
„Við spiluðum einfaldlega ekki nægilega vel og við leikmennirnir vitum af því. Ég óska Claudio góðs gengis í hverju því sem hann tekur sér fyrir og þakka honum enn og aftur fyrir samstarfið.“
