Klopp vill fá Fabregas til Liverpool í sumar

Ensku blöðin eru sammála með Liverpool-slúðrið í morgun en flest þeirra segja að Liverpool sé á höttunum eftir spænska miðjumanninum Cesc Fabregas. Liverpool fær hinsvegar mikla samkeppni frá erkifjendum sínum sem hafa líka sýnt áhuga á þessum gamla Arsenal-manni.

Cesc Fabregas er líklegast á sínu síðasta tímabili hjá Chelsea sem ætlar að losa sig við í sumar samkvæmd sömu fréttum.

Fabregas hefur aðeins byrjað tíu leiki með Chelsea á þessu tímabili eða síðan að Antonio Conte tók við liðinu. Hann hefur hinsvegar oft átt góðar innkomur af bekknum og á því óumdeildan þátt í meistaratitli Chelsea í ár. Fabregas er með 6 mörk og 10 stoðsendingar í öllum keppnum á leiktíðinnui.

Jürgen Klopp, knattspyrnustjóri Liverpool, ætlar að styrkja miðju liðsins í sumar og bæði Cesc Fabregas og Real Madrid maðurinn Isco eru á innkaupalistanum.

Klopp fær þó væntanlega samkeppni frá Jose Mourinho um Cesc Fabregas en Manchester United hefur einnig áhuga á þessum reynslumikla miðjumanni. Mourinho keypti einmitt Fabregas til Chelsea fyrir 30 milljónir punda sumarið 2014.

Ensku blöðin segja að kaupverðið á Cesc Fabregas verði á bilinu 25 til 30 milljónir punda eða frá 3,4 milljörðum til 4,1 milljarðar íslenskra króna.

Fabregas heldur upp á þrítugsafmælið sitt í þessari viku en hann á tvö ár eftir af samningi sínum sem skilar honum 170 þúsund pundum í vikulaun eða 23,4 milljónum íslenskra króna.

Klopp vill fá öflugan mann inn á miðjuna fyrir næsta tímabil. Lucas Leiva fer líklega til Galatasaray í sumar og Real Madrid hefur mikinn áhuga á því að kaupa Brasilíumanninn Philippe Coutinho. Þá hefur Jordan Henderson gengið illa að halda sér heilum á þessari leiktíð.

Cesc Fabregas spilaði sinn fyrsta leik í ensku deildinni með Arsenal árið 2003 og var hjá Skyttunum allt til ársins 2011 þegar hann fór til Barcelona. Eftir þrjú ár hjá Barcelona kom hann aftur til Englands og hefur því spilað ellefu af fjórtán tímabilum sínum á Englandi.

Hér fyrir neðan má sjá nokkrar forsíður ensku blaðanna þar sem þau slá upp áhuga Liverpool og Manchester United á Cesc Fabregas.