Lallana: Heill Sturridge er eins og tveir nýir leikmenn

Adam Lallana segir að heill Daniel Sturridge sé ígildi tveggja nýrra leikmanna fyrir Liverpool.

Sturridge, sem hefur verið mikið meiddur undanfarin ár, hefur litið afar vel út á undirbúningstímabilinu.

„Hann hefur verið algjörlega frábær á undirbúningstímabilinu. Það er ómetanlegt,“ sagði Lallana í samtali við The Telegraph.

„Hann er heimsklassa leikmaður. Hann kom vel undan sumri og er í góðu formi. Hann verður mikilvægur fyrir okkur á næsta tímabili. Ég veit það.“

Lallana vonast til að Sturridge haldist heill í vetur og muni raða inn mörkum fyrir Liverpool.

„Hann lítur út fyrir að vera mjög beittur og ef hann verður heitur í vetur og helst heill er það eins og að fá tvo nýja leikmenn,“ sagði Lallana.

Sturridge skoraði eitt marka Liverpool í 3-0 sigri á Herthu Berlin á laugardaginn. Dominic Solanke og Mohamed Salah voru einnig á skotskónum fyrir Rauða herinn.