Átta leikir verða spilaðir í dag þegar 6. umferð ensku úrvalsdeildarinnar hefst.
Í hádeginu tekur West Ham á móti Tottenham í Lundúnaslag. Tottenham eru með átta stig eftir fimm leiki, en West Ham aðeins fjögur. Leikurinn verður í beinni útsendingu á Stöð 2 Sport klukkan 11.20.
Sex leikir verða flautaðir á klukkan 14:00.
Manchester City taka á móti Crystal Palace. City hafa verið á miklu flugi og eru á toppi deildarinnar, en Palace eru án stiga á botninum.
Nágrannarnir í Manchester United, sem deila toppsætinu með City, fara suður til Southampton. Sá leikur verður í beinni útsendingu á Stöð 2 Sport.
Stoke fá Englandsmeistara Chelsea í heimsókn á bet365 leikvanginn. Chelsea hafa byrjað titilvörnina ágætlega og eru með 10 stig í þriðja sætinu. Stoke hafa aðeins unnið einn leik og eru með fimm stig.
Gylfi Þór Sigurðsson og félagar í Everton fá Bournemouth í heimsókn á Goodison Park. Everton hafa aðeins unnið einn leik á tímabilinu og eru í fallsæti með fjögur stig. Bournemouth er þar fyrir neðan með þrjú stig.
Burnley, með Jóhann Berg Guðmundsson innanborðs, fær nýliða Huddersfield í heimsókn. Bæði lið hafa unnið tvo leiki og eru með átta stig.
Swansea fær Watford í heimsókn til Wales. Swansea hafa aðeins unnið einn af fyrstu fimm leikjum sýnum, en Watford tvo.
Í lokaleik dagsins fer Jurgen Klopp með sína menn í Liverpool til Leicester. Sá leikur fer fram klukkan 16:30 og er í beinni útsendingu á Stöð 2 Sport.
Upphitunarmyndband fyrir leiki dagsins má sjá í spilaranum hér að ofan.
Enski boltinn
