Redknapp rekinn eftir sex töp í röð

Birmingham City rak Harry Redknapp eftir 1-3 tap fyrir Preston í ensku B-deildinni í dag.

Birmingham hefur nú tapað sex leikjum í röð í öllum keppnum. Liðið situr í næstneðsta sæti B-deildarinnar með aðeins fjögur stig eftir átta umferðir.

Redknapp tók við Birmingham þegar þrír leikir voru eftir af síðasta tímabili. Tveir þeirra unnust og Birmingham hélt sér uppi. Í maí skrifaði Redknapp svo undir eins árs samning við Birmingham.

Hinn sjötugi Redknapp keypti 14 leikmenn í sumar en þeir hafa litlu skilað.

Redknapp er fyrsti knattspyrnustjórinn í B-deildinni sem fær að fjúka á tímabilinu.