Huddersfield kaupir samherja Rúriks

Huddersfield Town hefur fest kaup á marokkóska sóknarmanninum Abdelhamid Sabiri frá Nürnberg í Þýskalandi.

Þessi tvítugi strákur þykir mikið efni en hann skoraði fimm mörk í níu leikjum fyrir aðallið Nürnberg þar sem hann lék með íslenska landsliðsmanninum Rúrik Gíslasyni.

Sabiri skrifaði undir þriggja ára samning við Huddersfield sem hefur farið frábærlega af stað í ensku úrvalsdeildinni.

Nýliðarnir hafa unnið fyrstu tvo leiki sína með markatölunni 4-0 og sitja í 2. sæti deildarinnar.

Næsti leikur Huddersfield er gegn Southampton á laugardaginn.