Evrópumeistari á leið til West Ham

West Ham er nálægt því að landa portúgalska miðjumanninum William Carvalho sem leikur með Sporting. BBC greinir frá.

West Ham steinlá fyrir Manchester United, 4-0, í 1. umferð ensku úrvalsdeildarinnar í gær. Hamrarnir litu alls ekki vel út og ef marka má leikinn í gær verður þetta langt tímabil á Lundúnaleikvanginum.

Slaven Bilic, knattspyrnustjóri West Ham, vinnur nú að því styrkja liðið og hann vill ólmur fá Carvalho sem varð Evrópumeistari með Portúgal í fyrra.

Talið er að West Ham þurfi að borga 30 milljónir punda fyrir hinn 25 ára Carvalho sem yrði þá dýrasti leikmaður í sögu félagsins.

Carvalho hefur leikið 37 leiki fyrir portúgalska landsliðið og skorað eitt mark.