Ekki hægt að útiloka nóróveirusmit fyrr á Úlfljótsvatni

Ekki er útilokað að fyrstu tilfelli nóróveirunnar, sem hefur lagst á skáta við Úlfljótsvatn að undanförnu, hafi komið upp á alþjóðlega skátamótinu sem haldið var þar um síðustu mánaðamót. Tíu ný veirusmit komu upp á svæðinu í gærkvöldi og í nótt og voru þeir veiku settir í einangrun á staðnum.

Níu skátar og einn starfsmaður á Útilífsmiðstöðinni hér við Úlfljótsvatn smituðust af veirunni í gærkvöldi og í nótt. Þeim var öllum komið fyrir í einangrun en eru allir að koma til.

Tilfellin sem komu upp í gærkvöldi og í nótt eru hjá skátum sem dvöldu í fjöldahjálparstöðinni í Hveragerði um síðustu helgi en höfði ekki verið með einkenni veirunnar þá. Sé smit til staðar getur það tekið 24-48 klukkustundir fyrir einkennin að koma fram og ganga veikindin nokkuð hratt yfir.

„Einkennin eru þau sömu og lítur eins út þegar þetta er að gerast. Dreifist áþekkt og þess háttar,“ segir Elín Esther Magnúsdóttir, framkvæmdastjóri Útilífsmiðstöðvar skáta við Úlfljótsvatn.

Í heildina hafa á níunda tug skáta smitast af veirunni frá því hún kom upp fyrir helgi og þá hafa þrír starfsmenn á Úlfljótsvatni einnig greinst með smit.

„Þetta smit núna einangrast alveg við þann hóp,“ segir Elín Esther.

Sérstakt teymi hefur lokið við að sótthreinsa fjöldahjálparstöðina sem opnuð var í grunnskólanum í Hveragerði fyrir helgi en hópur sjálfboðaliða sá um þrif á Úlfljótsvatni um helgina. Eftir að nýju tilfellin komu upp í gær og í nótt þarf að sótthreinsa þar aftur en mikill kostnaður skapast við þrifin og svo getur farið að loka þurfi Útilífsmiðstöðinni á Úlfljótsvatni í allt að þrjár vikur en það er talinn líftími veirunnar sem herjað hefur á svæðinu. Upptökin hafa enn ekki fundist.

„Frá okkar bæjardyrum og svona það sem við höfum hlerað óformlega þá lýtur allt út fyrir að sé komið á staðinn frekar en að þetta hafi verið á staðnum og nær svo bara að breiðast út í margmenninu,“ segir Elín Esther.

Fréttastofan hefur heimildir fyrir því að tíu einstaklingar hafi veikst á sama tíma þegar alþjóðlegt skátamót var haldið á Úlfljótsvatni um mánaðamótin. Einkenni þeirra voru svipuð eða þau sömu og komu upp hjá skátunum í síðustu viku og í gærkvöldi og í nótt. Þá voru þeir allir settir í einangrun á staðnum.

„Það kemur upp áþekkt mál á skátamótinu. Samkvæmt þeim heilbrigðisstarfsmönnum sem við höfum talað við núna síðustu daga þá er talað um að þetta séu óskyld mál,“ segir Elín Esther.

Það sé hins vegar ekki hægt að staðfesta. Læknir ásamt öðru heilbrigðisstarfsfólki var við störf á mótinu lagði mat á að ekki væri um smitandi veiru sýkingu að ræða og voru engin sýni voru tekin og málin ekki tilkynnt þegar þau komu upp.