Bregðast við dræmri miða­sölu á ofur­leikinn

Íþróttir „Það er ekkert leyndarmál að miðasala fór hægt af stað,“ segir Klara Bjartmarz, framkvæmdastjóri Knattspyrnusambands Íslands, um hvernig gangi að selja miða á æfingaleik Manchester City og West Ham 4. ágúst.

Ensku úrvalsdeildarliðin munu mætast á Laugardalsvelli en þetta verður síðasti leikur beggja liða áður en deildin hefst í ágúst. Leikurinn var tilkynntur á stórum blaðamannafundi í höfuðstöðvum KSÍ í Laugardalnum. Um er að ræða leik sem kallast The Super Match en í sams konar leik mættust Man­chester United og Galatasaray á síðasta ári í Svíþjóð. Á fundinum var tilkynnt að stefnt væri að því að slá áhorfendametið á Laugardalsvelli.

Miðamál og miðasala koma KSÍ ekkert við heldur fyrirtækinu Super Match en miðasala fer í gegnum miði.is. Þar eru einu teikningarnar sem til eru af Laugardalsvelli og sést vel að mörg sæti eru óseld. Miðaverð er frá 5.899 en dýrustu miðarnir eru á 16.899 krónur. Flestir seldir miðar eru fyrir miðju á nýju stúkunni.

Til að auka áhugann mun Super Match fara í heilmikla fjölmiðlaherferð og endurhugsa miðamálin og sem dæmi er nefnt að miðaeigendur munu fá að hitta leikmenn í svokölluðu „meet and greet“ og fá aðgang að æfingu eða jafnvel æfingum en margir af frægustu leikmönnum heims spila með Manchester City og nægir að nefna Íslandsvininn Sergio Agüero, David Silva, Kevin De Bruyne og brasilíska undrabarnið Gabriel Jesus. West Ham á nokkuð traustan og góðan stuðningsmannahóp á Íslandi en liðið átti þrjá lykilmenn í enska landsliðinu sem hampaði heimsmeistaratitlinum árið 1966, meðal annars fyrirliðann, Bobby Moore.

Klara segir að hugmyndir Super Match séu áhugaverðar og hlakkar til ef þær verða að veruleika. „Kannski er eitthvað sem þeir gera sem KSÍ getur tileinkað sér í framtíðinni.“