Börn njóti alls vafa vakni grunur um ofbeldi

Margrét Pála Ólafsdóttir, talsmaður Hjallastefnunnar, segir að allir starfsmenn barnaskóla Hjallastefnunnar í Öskjuhlíð glími nú við áfallið sem fylgir í kjölfar þess að tveimur starfsmönnum skólans var vikið úr starfi. Greint var frá því í kvöldfréttum Stöðvar 2 síðastliðinn fimmtudag að skólastjóra og stuðningsfulltrúa skólans hafi verið vikið frá störfum vegna gruns um að þau hafi beitt börn ofbeldi. Margrét Pála segir að börn njóti alls vafa ef grunur vaknar um slíkt.

„Síðustu dagar hafa reynst mér þungir í skauti og í reynd sársaukafyllri en nokkur orð fá lýst,“ skrifar Margrét Pála á Facebook síðu sinni. Hún segist hafa valið að koma hreint fram í fréttum enda sjái hún ekki ástæðu til annars.

Sjá einnig: Skólastjóri og stuðningsfulltrúi hjá Hjallastefnunni grunaðir um að beita börn ofbeldi

„Upplýsingar um þetta mál bárust mér eftir skólaslit og útskrift viðkomandi barna, því miður, og gripum við samdægurs til aðgerða samkvæmt starfsreglum okkar. Þar á meðal voru umræddir starfsmenn tafarlaust settir í leyfi frá skólastarfi enda njóta börn alls vafa ef grunur vaknar. Allir starfsmenn skólans glíma nú við áfallið sem fylgir í kjölfarið og allir foreldrar og nemendur taka málið einnig mjög nærri sér.“

Hún segir að þó að könnun Barnaverndarnefndar og rannsókn lögreglu taki oft langan tíma verði að sýna því skilning því málið þurfi að vinna vandlega til að skýr niðurstaða fáist.

„Biðin er þó erfið og sársaukafull fyrir alla hlutaðeigandi svo ekki sé dýpra í árinni tekið. Gildir það jafnt um þá sem mögulega hafa sýnt af sér atferli sem er ábótavant sem og þau börn og foreldra sem málið snýst um. Ekkert fær lýst harmi mínum og sorg gagnvart öllum málsaðilum.“

Sjá einnig: Hjallastefnan mögulega gert mistök með því að bregðast ekki strax við

„Ég vil þakka ykkur innilega, foreldrar, stuðningsfólk og velunnarar Hjallastefnunnar sem hafið sýnt okkur skilning og hlýhug á þessum erfiðu dögum. Símtöl, póstar og skilaboð ykkar eru ómetanleg. Eins þakka ég innilega öllum þeim sem hafa fylgst með fréttum, bæði foreldrum og öðrum sem hafa valið að draga andann djúpt og bíða róleg eftir niðurstöðum Barnaverndarnefndar fremur en að bjóða dómstóli götunnar að taka við þessu viðkvæma máli. Það er drengskaparlega gert, ekki síst í samfélagi sem á það til að fara fram í fjölmiðlum og á samfélagsmiðlum með órökstuddar yfirlýsingar og sleggjudóma. Nógu erfið eru svona mál í eðli sínu, ekki síst þar sem allt starfsfólk er bundið trúnaði og getur engu svarað. Með hag barna í huga ættum við öll að skapa frið um rannsókn mála og treysta fagaðilum fyrir að leiða mál til lykta.“

Færslu Margrétar Pálu má lesa í heild sinni hér fyrir neðan.