Þetta er tölfræðin sem gæti fellt Swansea

Þrátt fyrir að Paul Clement hafi náð að snúa við gengi Swansea eftir að hann tók við liðinu í upphafi ársins er útlit fyrir að það verði barátta fram á vor að bjarga sæti liðsins í ensku úrvalsdeildinni.

Swansea hefur náð að koma sér úr fallsæti deildarinnar í það sextánda eftir að Clement tók við en liðið varð af afar mikilvægum stigum þegar það tapaði fyrir Hull á laugardag, 2-1.

Í stað þess að Swansea næði að koma sér níu stigum frá Hull, sem er í átjánda og þriðja neðsta sæti deildarinnar, munar nú aðeins þremur stigum á liðunum.

En tölfræðin sem ætti að valda stuðningsmönnum Swansea áhyggjum er að engu liði í sögu ensku úrvalsdeildarinnar hefur tekist að bjarga sæti sínu eftir að hafa fengið á sig 60 mörk í fyrstu 28 leikjum tímabilsins.

Sjá einnig: Gylfi orðinn stoð­sendinga­hæstur í Evrópu

Með mörkunum tveimur sem Oumar Niasse skoraði fyrir Hull um helgina hefur Swansea nú fengið á sig 61 mark eftir 28 umferðir, flest allra í deildinni. Næst á eftir koma Hull og Bournemouth með 54 mörk hvort.

Gylfi Þór Sigurðsson, sem lagði upp enn eina markið um helgina, og félagar hans í Swansea mæta einmitt Bournemouth í síðdegisleik ensku úrvalsdeildarinnar á laugardag. Með sigri nær Swansea að jafna Bournemouth að stigum en með tapi verður bilið á milli liðanna sex stig og staða Swansea í fallbaráttunni þeim mun verri.