Blöðin eru að ljúga

Arsene Wenger, stjóri Arsenal, segir að það sé ekkert til í þeim fréttum að Alexis Sanchez hafi lent í hávaðarifrildi við liðsfélaga sína á æfingu.

Í morgun var það sögð vera aðalástæðan fyrir því að Sanchez var ekki í byrjunarliði Arsenal gegn Liverpool um nýliðna helgi.

„Ég veit ekki til þess að nokkuð slíkt hafi gerst,“ sagði Wenger á blaðamannafundi nú upp úr hádegi.

„Ég útskýrði það eftir leikinn að þetta hefði verið taktísk ákvörðun. Sanchez er að gera sitt besta fyrir Arsenal og stundum eru læti í honum en þannig hefur það oft verið í sögu þessa félags.“

Wenger segir að samband sitt við Sanchez sé í fínu lagi og ekkert út á það að setja.

„Ég skil að þið þurfið að fylla blaðsíður en þessar fréttir eru ósannar með öllu.“