Gylfi: Aldrei minn vilji að fara

Það er óhætt að segja að janúarmánuður hafi verið gjöfull fyrir Gylfa Þór Sigurðsson og félaga hans í Swansea City. Þegar árið 2017 gekk í garð voru Svanirnir á botni ensku úrvalsdeildarinnar með aðeins 12 stig, fjórum stigum frá öruggu sæti.

Mánuði síðar er staðan allt önnur. Swansea hefur unnið þrjá af síðustu fjórum leikjum sínum og er komið með 21 stig. Og það sem mikilvægast er, liðið er komið upp úr fallsæti.

„Andrúmsloftið er miklu betra og það er léttara yfir hópnum, enda hefur janúar verið fínn. Níu stig gera heilmikið fyrir lið í neðri hlutanum,“ sagði Gylfi í samtali við Fréttablaðið í gær.

Ánægður með nýja stjórann

Í byrjun árs var Paul Clement ráðinn knattspyrnustjóri Swansea. Hann hafði getið sér gott orð sem aðstoðarmaður Carlos Ancelotti en reynsla hans sem aðalþjálfari var lítil. Gylfi ber Clement vel söguna.

„Hann er góður og veit alveg hvað hann er að gera. Það er ekki hægt að kvarta neitt yfir því. Síðan hann kom höfum við spilað mjög vel og sótt stig,“ sagði Gylfi.

Í frjálsu hlutverki á kantinum

Í öllum þremur sigurleikjum Swansea í janúar hefur Gylfi spilað úti á vinstri kantinum. Framan af tímabili spilaði hann bæði sem fremsti miðjumaður og framherji. Hann segir að þetta hringl með stöður hafi ekki mikil áhrif á sig og þegar honum sé stillt upp á kantinum hafi hann mikið frjálsræði.

„Ég er mikið inni á miðjunni og ekki að hanga úti á kanti. Hann gefur mér frjálst hlutverk til að fara inn á miðjuna þegar við erum með boltann og erum að sækja,“ sagði Gylfi og bætti því að hann færði sig vanalega út til vinstri þegar Swansea er ekki með boltann.

Gylfi hefur skorað sjö mörk og gefið sjö stoðsendingar og komið með beinum hætti að helmingi marka Swansea í úrvalsdeildinni. Hann kveðst ánægður með frammistöðu sína á tímabilinu.

„Ég er mjög sáttur. Það hefur gengið vel að skora og leggja upp mörk. Vonandi heldur það áfram og við bætum aðeins fleiri sigrum við,“ sagði Gylfi sem setur sér alltaf markmið varðandi mörk og stoðsendingar fyrir hvert tímabil. Hann segist vera á góðri leið með að ná þeim.

Áhugi frá Asíu

Gylfi var orðaður við ýmis félög í janúarglugganum en hann segir að það hafi ekki komið til greina að fara frá Swansea.

„Það var einhver áhugi en ég ætlaði ekki að skipta um lið. Mig langar að vera hérna áfram, snúa blaðinu við og halda okkur í deildinni. Það var aldrei minn vilji að fara neitt,“ sagði Gylfi.

Sú saga flaug nokkuð hátt að Swansea hefði hafnað 30 milljóna punda tilboði frá kínversku liði í Gylfa í janúarglugganum.

„Ég heyrði ekkert af neinu tilboði. Ég veit ekkert hvort það er satt. En það var einhver áhugi frá Asíu,“ sagði Gylfi.

Landsliðsmaðurinn hefur verið besti leikmaður Swansea á tímabilinu og er án efa mikilvægasti leikmaður velska liðsins. Gylfi er meðvitaður um ábyrgðina sem er á hans herðum og segist þrífast á henni.

„Mér finnst það fínt. Ég veit að ég þarf að standa mig vel í hverjum einasta leik og það er undir mér, og nokkrum öðrum, komið að skora og búa til mörk. Þetta heldur mér gangandi,“ sagði Gylfi.

Yndisleg stund á Anfield

Swansea ræðst ekki á garðinn þar sem hann er lægstur á morgun en þá sækir liðið Manchester City heim. Gylfi hefur á ferli sínum í ensku úrvalsdeildinni skorað á völlum eins og Old Trafford og Anfield.

Hann skoraði sigurmark Swansea gegn Liverpool á Anfield fyrir tveimur vikum og segir það hafa verið draumi líkast, enda stuðningsmaður Man­chester United frá æsku.

„Það var frábært og eitthvað sem mann dreymdi um þegar maður var lítill. Þetta var yndisleg stund,“ sagði Gylfi Þór Sigurðsson að lokum.